Elimizde 2027 jyly iri data-ortalyq iske qosylady: joba qaı satyda
ASTANA. KAZINFORM — Premer-mınıstr Oljas Bektenov Memleket basshysy Qasym-Jomart Toqaevtyń tsıfrlyq ekonomıkany jáne tıisti ınfraqurylymdy damytý jónindegi tapsyrmalaryn oryndaý sheńberinde Pavlodar oblysynda «Derekterdi óńdeý ortalyqtary alqaby» (Data Center Valley) jobasyn júzege asyrý barysy týraly jıyn ótkizdi.
Júrgizilip jatqan jumystar jóninde Premer-mınıstrdiń orynbasary — jasandy ıntellekt jáne tsıfrlyq damý mınıstri Jaslan Mádıev, «Qazaqtelekom» AQ basqarma tóraǵasy Baǵdat Mýsın baıandady.
Qýaty 50 MVt bolatyn «DÓO alqabynyń» birinshi nysanynyń qurylysy qarqyndy júrýde, energııa ortalyqtary men AI-fabrıkalardyń ǵımarattaryna arnalǵan qazanshuńqyrlardy ázirleý boıynsha jumystar 90%-ǵa aıaqtaldy, energııa ortalyqtarynyń irgetasy qalana bastady, ákimshilik-turmystyq úı-jaılar salynyp jatyr.
2026 jyldyń jeltoqsan aıynyń sońyna deıin data-ortalyq pen energobloktardyń, ákimshilik-turmystyq keshenniń, baqylaý-ótkizý pýnktteriniń, syrtqy ınjenerlik jelilerdiń bir bóliginiń negizgi korpýstary turǵyzylatyn bolady. Іske qosý-jóndeý jumystary 2027 jyldyń mamyr aıynda aıaqtalady. Birinshi nysandy paıdalanýǵa berý 2027 jylǵy maýsymǵa josparlanǵan.
Sonymen qatar alańnyń ınjenerlik ınfraqurylymy da damyp jatyr. Jobany energııamen jabdyqtaý úshin qýaty 215 MVt bolatyn qosalqy stansa satyp alyndy, sýmen jabdyqtaý jelileriniń jobasy ázirlendi jáne telekommýnıkatsııalyq ınfraqurylymnyń jobasy jasalyp jatyr. Qurylys alańynda jumys barysyn táýlik boıy baqylaýǵa múmkindik beretin onlaın-beınebaqylaý júıesi jumys isteıdi. Data Center Valley-diń uzaqmerzimdi energetıkalyq áleýeti jalpy qýaty 1 GVt-qa deıin kezeń-kezeńimen keńeıe bermek.
Bul joba — derekter ortalyqtaryn, AI-fabrıkalardy, GPU-klasterlerdi jáne halyqaralyq gıperskeılerlerdiń bultty platformalaryn ornalastyryp, olardy odan ári keńinen taratýǵa arnalǵan alań. Ony júzege asyrý Qazaqstanda tsıfrlyq ekonomıkanyń eksportqa baǵdarlanǵan jańa sektoryn quryp, jasandy ıntellekt salasyndaǵy otandyq sheshimderdi ázirleý úshin IT-ınfraqurylymdy qamtamasyz etedi.
— Data Center Valley Qazaqstannyń jańa eksporttyq áleýetin qalyptastyrady. Esepteý qýatyn el ishinde ornalastyra otyryp, biz otandyq AI-sheshimderdi damytýǵa, jahandyq kompanııalardy tartýǵa jáne Qazaqstannyń halyqaralyq tsıfrlyq qyzmetter naryǵyna shyǵýyna jaǵdaı jasaımyz, — dep atap ótti Jaslan Mádıev.
Firebird AI jáne NVIDIA halyqaralyq tehnologııalyq seriktesterimen birge Data Center Valley bazasynda jasandy ıntellekt, bultty tehnologııalar jáne jańa býynnyń tsıfrlyq qyzmetterin damytý úshin zamanaýı ekojúıe qurylady. Sonymen qatar qosymsha IT-qýattardy qurý boıynsha birqatar sheteldik kompanııamen yntymaqtastyq pysyqtalyp jatyr. Kelissózder sonymen qatar jańa ınvestorlar men negizgi klıentterdi tartýdy, ónimdiligi joǵary esepteý klasterlerin ornalastyrýdy jáne bultty qyzmetterdi damytýdy qamtıdy.
— Bizdiń birinshi kezektegi mindetimiz — birinshi nysannyń qurylysyn 2027 jyldyń maýsym aıynda aıaqtaý. Sonymen qatar klıentter tarapynan rastalǵan suranysty eskere otyryp, kampýs qýatyn dáıekti túrde arttyrýǵa múmkindik beretin ınjenerlik negiz quryp jatyrmyz, — dep atap ótti Baǵdat Mýsın.
Budan bólek, jıyn aıasynda Qazaqstanda shet memleketterdiń derekterin olardyń tolyq zańdy egemendigin saqtaı otyryp ornalastyrý múmkindigin kózdeıtin Cloud First Policy (Data Embassy) jobasyn daıyndaý barysy qaraldy.
Oljas Bektenov Prezıdent jarııalaǵan Tsıfrlandyrý jáne jasandy ıntellekt jyly aıasynda «DÓO alqaby» jobasynyń mańyzdylyǵyn atap ótti. Data Center Valley jobasyn júzege asyrý Qazaqstannyń tehnologııalyq egemendigin nyǵaıtyp, jasandy ıntellektini damytýǵa qajetti ınfraqurylymdyq negiz qalyptastyrady jáne elimizdiń jahandyq esepteý qýattary naryǵyndaǵy rólin arttyrady.
— Jańa Konstıtýtsııanyń qabyldanýymen Qazaqstan ekonomıkasyn odan ári jańǵyrtý jáne jahandyq básekege qabilettilikti arttyrý múmkindikteri keńeıtilýde. «DÓO alqaby» jobasy — iri ınfraqurylymdyq joba ǵana emes, bul bizdiń elimizdiń odan ári tehnologııalyq damýynyń negizi. Ony júzege asyrý Memleket basshysynyń turaqty baqylaýynda. Jasandy ıntellekt pen bultty servısterdiń qýatty bazasyn qalyptastyrý bıznes úshin jańa múmkindikterge jol ashyp, Qazaqstannyń Ortalyq Azııadaǵy óńirlik AI haby retindegi rólin kúsheıtedi. Jobany ýaqtyly júzege asyrýdy qamtamasyz etý qajet, bul úshin barlyq jaǵdaılar jasalǵan, — dep atap ótti Oljas Bektenov.
Jıyn qorytyndysy boıynsha Premer-mınıstr jaýapty memlekettik organdar men kvazımemlekettik sektor sýbektilerine qurylys jumystarynyń ýaqtyly oryndalýyn qamtamasyz etý jáne jańa áriptesterdi tartý úshin sheteldik tehnologııalyq kompanııalarmen ózara is-qımyldy keńeıtý jóninde birqatar tapsyrma berdi.
Eske salaıyq, buǵan deıin Úkimet JI negizindegi memlekettik qyzmetterdi damytýǵa nazar aýdaratynyn jazǵan edik.
