Qazaqstanda 1,5 mln. gektar jer jeke menshiktiń qolynda - Ó. Ózbekov

Sonyń ishinde aýyl sharýashylyǵy qurylymdarynyń menshiginde 861 500 gektar jer bar. 491 myń gektar Qazaqstan azamattarynyń jeke menshigine tıesili, al elimizdiń zańdy tulǵalarynyń menshiginde 371 myń gektar jer bar. Qazaqstan azamattaryna aýyldyq aýmaqtardan jeke turǵyn úı salýǵa bólingen jerlerdiń kólemi óte az, shamamen 75 myń gektar jer.

«Elimizde aýyl sharýashylyǵy maqsatyna arnalǵan jerlerdiń úlesi 33 paıyz, shamamen 95 mln. gektarǵa jýyq jer bar. Búginderi sonyń 1 paıyzy ǵana jeke menshik sektordyń qolynda. Olardyń basym kópshiligi uzaq merzimge jalǵa alynǵan jerler», - dedi Ó. Ózbekov.

«Keıbir adamdar 2003 jyly qabyldanǵan Jer Kodeksi óziniń maqsatyn oryndaǵan joq, 7 jyl ishinde jeke menshik sektordaǵy jer ýchaskeleriniń kólemi kóbeımedi, dep renish bildiredi. Biz úshin eń basty maqsat - jeke menshik úlesin arttyrý emes, jeke menshik ınstıtýtynyń negizin qalaý boldy. Al ondaǵy basty prıntsıp aýyl sharýashylyǵyna arnalǵan jerlerdi azamattarǵa aqyly negizde bólý bolyp otyr. Bul salada naryqtyq qatynastyń bolýy jer naryǵy úshin asa mańyzdy», - dep atap kórsetti ol.

«Menińshe Qazaqstannyń agroónerkásiptik kesheni neǵurlym damı túsken saıyn, jeke menshik qoldaǵy jer alaptarynyń úlesi soǵurlym arta túsedi», - dedi Ó. Ózbekov.

Jer resýrstaryn basqarý agenttiginiń tóraǵasy atap kórsetkenindeı, qazirgi ýaqytta árbir azamattyń aýyl sharýashylyq maqsatyna arnalǵan jer telimin jeke menshikke, ne bolmasa ony 49 jylǵa deıin uzaq merzimdi ýaqytqa jalǵa alý quqyǵyn ıelenýge múmkindigi bar.

Qazaqstandyqtar aqysyz negizde jeke turǵyn úı salýǵa, jeke qosalqy sharýashylyǵyn júrgizýge, baý-baqshaǵa jáne saıajaı sharýashylyqtaryna kishigirim jer telimderin alýǵa zań boıynsha quqyly. «Bul ózinshe bir áleýmettik baǵyt bolyp tabylady. Ol boıynsha, bizde bir jolǵy aqysyz jer telimin bólý zańmen qarastyrylǵan», - deıdi ol.