Qazaqstanda 1,5 mln adam KVI boıynsha testten ótti

NUR-SULTAN. QazAqparat – Densaýlyq saqtaý mınıstri Alekseı Tsoı aldaǵy ýaqytta Qazaqstanda PTR-testten ótkizý jıiligi 35 myń adamǵa artatynyn málimdedi, dep habarlaıdy QazAqparat tilshisi.

«Elde testileýdi qoljetimdi etý úshin 20 PTR-analızator satylyp alynýda. Bul zerthanalardyń ótkizý múmkindigin táýligine 35 myń adamǵa deıin arttyra túsedi. PTR-testten ótkizý úshin 8 kóshpeli zerthana satylyp alynady. Búginge deıin 1,5 mln adam KVI boıynsha testten ótti. Test epıdemıologııalyq kórsetkish boıynsha júrgiziledi», - dedi Alekseı Tsoı OKQ-da ótken baspasóz máslıhatynda.

Sonymen birge mınıstr óz sózinde halyqty shekteý sharalaryn qatań saqtaýǵa shaqyrdy. Onyń aıtýynsha, dál qazirgi ýaqytta bir adamnyń áreketi birneshe adamnyń ómirin saqtap qala alady.

Eske sala ketsek, búgin QR Premer-Mınıstri Asqar Mamınniń tóraǵalyǵymen ótken Memlekettik komıssııa otyrysynda QR Prezıdenti Qasym-Jomart Toqaevtyń tapsyrmasyna sáıkes Qazaqstandaǵy epıdemıologııalyq ahýaldy turaqtandyrý sharalary qaralǵan bolatyn. Memlekettik komıssııanyń sheshimimen 5 shildeden bastap 14 kúnge qatań shekteý sharalaryn engizetin boldy.