Qazaqstanda 1 356 kópbalaly otbasy jaldamaly páterge qol jetkizdi
Baspasóz qyzmetiniń málimetinshe, «Nurly jer» baǵdarlamasy aıasynda 2025 jylǵa deıin az qamtylǵan kópbalaly otbasylar úshin 40 myń jaldamaly páter salynatyn bolady.
«Tek mamyr aıynda ǵana barlyq qarjy kózderi esebinen búkil elimiz boıynsha 1 356 kópbalaly otbasy baspanamen qamtamasyz etildi. Kópbalaly otbasylarǵa turǵyn úı berýdiń alǵashqy nátıjeleri osyndaı. Bul jumys mınıstrliktiń turaqty baqylaýynda. Búgingi tańda Qazaqstanda 31 725 otbasy sharshy metrge muqtaj jandar retinde ákimdikterde esepte tur», delingen habarlamada.
«Turǵyn úı qurylys jınaq banki» AQ arqyly qosymsha shara retinde maýsym aıynda kópbalaly, tolyq emes otbasylardy, sondaı-aq múmkindigi shekteýli balalary bar otbasylardy jeńildikpen nesıeleýdi iske qosý josparlanyp otyr. Bul qaryzdar jyldyq 2% stavka boıynsha, 20 jylǵa deıingi merzimge, bastapqy jarnasy 10% - dan bastap beriledi. Bastapqy jarnanyń bir bóligi turǵyn úı sertıfıkatymen jabylýy múmkin.
QR IIDM Qurylys jáne turǵyn úı-kommýnaldyq sharýashylyq isteri komıtetiniń derekteri boıynsha, búgingi kúni kezekte turǵan kópbalaly otbasylar 2025 jylǵa deıin memleketten turǵyn úımen tolyq qamtamasyz etiledi.
«Tek bıyl ǵana 12 myń otbasy óz páterine qonystanady (6 myńy jaldamaly turǵyn úı esebinen jáne 6 myńy «Turǵyn úı qurylys jınaq banki» arqyly jeńildikpen nesıe berý esebinen). Osylaısha, 3-4 jyl ishinde mınıstrlik turǵyn úıge muqtaj kópbalaly otbasylardyń máselesin tolyq sheshýdi josparlap otyr. Qabyldanyp jatqan sharalar az qamtylǵan kópbalaly otbasylardyń turǵyn úı jaǵdaıyn jaqsartýǵa múmkindik beredi, bul tutastaı alǵanda elimizdiń halqynyń ál-aýqaty men ómir súrý sapasyn arttyrady», delingen habarlamada.
