Qazaqstanda 1 242 eldi mekendi sý basý qaýpi bar
ASTANA. KAZINFORM — Qazaqstanda sý basý qaýpi bar 1 242 eldi meken anyqtaldy. 2027 jylǵy kóktemgi sý tasqynyna daıyndyq aıasynda óńirlerde 424 ınjenerlik is-shara josparlanǵan. Onyń ázirge 280-i oryndaldy. Bul týraly Premer-mınıstrdiń orynbasary Qanat Bozymbaev tóraǵalyq etken keńeste aıtyldy.
Keńeste óńirlerdiń 2026–2027 jyldardaǵy qys mezgiline daıyndyǵy jáne kóktemgi sý tasqynynyń aldyn alý sharalary talqylandy.
Bıyl 119,4 shaqyrym qorǵanys bógetteri men úıindileri salynyp, jóndelip, nyǵaıtyldy. Sonymen qatar 156 shaqyrym drenaj júıesi salynyp, qalpyna keltirildi. Avtomobıl jáne temirjoldardyń astyndaǵy 299 sý ótkizý qurylysy ornatylyp, aýystyryldy.
Aqmola, Soltústik Qazaqstan, Shyǵys Qazaqstan jáne Abaı oblystaryndaǵy jaǵdaıǵa erekshe nazar aýdaryldy. Bul óńirlerde birqatar eldi mekendi sý basý qaýpi saqtalyp otyr. Sondyqtan josparlanǵan ınjenerlik jumystardy aıaqtaý qajet.
— Kóktemge deıin áli biraz ýaqyt bar. Alaıda barlyq daıyndyq jumystaryn qys bastalǵanǵa deıin aıaqtaý qajet, — dedi Qanat Bozymbaev.
Ol ákimdikterge sý tasqynyna qarsy shuǵyl jumystardy aıaqtaýdy, qorǵanys qurylystaryn nyǵaıtýdy, sý burý arnalary men jol ınfraqurylymyn daıyndaýdy tapsyrdy.
Sý resýrstary jáne ırrıgatsııa mınıstrligine sý qoımalarynyń jaı-kúıin baqylaýdy kúsheıtý, al Qazgıdrometke 2027 jylǵy aqpanǵa deıin óńirler boıynsha sý tasqyny qaýpin baǵalaıtyn egjeı-tegjeıli gıdrologııalyq boljam ázirleý mindetteldi. Sonymen qatar «Tasqyn» aqparattyq júıesin jańǵyrtý tapsyryldy.
Keńes qorytyndysy boıynsha Tótenshe jaǵdaılar mınıstrligine qutqarý qyzmetteriniń, materıaldyq rezervter men evakýatsııalyq pýnktterdiń daıyndyǵyn tekserý úshin respýblıkalyq komandalyq-shtabtyq oqý-jattyǵýlar uıymdastyrý júkteldi.
Eske salaıyq, buǵan deıin Qazaqstanda sý tasqynyn boljaıtyn aqparattyq ortalyq jumysyn bastaǵanyn habarlaǵanbyz.