Qazaqstanda 1 123 aýyl talshyqty ınternetpen qamtylady

ASTANA. KAZINFORM – QR Tsıfrlyq damý, ınnovatsııalar jáne aeroǵarysh ónerkásibi mınıstrligi «Qazaqstannyń ınklıýzıvti ekonomıkasy úshin jedeldetilgen tsıfrlandyrý» jobasynyń bastalǵanyn jáne baılanys operatorlary úshin úlestik granttar alýǵa ashyq konkýrs jarııalanǵanyn habarlady.

Konkýrs atalǵan jobany iske asyrý aıasynda ótkiziledi. Negizgi maqsat – aýyldyq jerlerde telekommýnıkatsııalyq ınfraqurylymdy damytý jáne aýyl turǵyndaryn jyldamdyǵy keminde 100 Mbıt/s bolatyn ınternet jelisimen qamtamasyz etý.

- Joba jergilikti ınternetke qoljetimdilik jelisi joq 1 123 aýyldyq eldi mekende talshyqty-optıkalyq baılanys jelilerin salýdy kózdeıdi.

Jobany júzege asyrý nátıjesinde 445 myńnan astam úı sharýashylyǵy qosylyp, shamamen 2,3 mıllıon adam joǵary jyldamdyqty ınternetke qol jetkizedi, - delingen aqparatta.

Joba aıasynda baılanys operatorlaryna aýyldyq jerlerde telekommýnıkatsııalyq jelilerdi salýǵa jumsalǵan rastalatyn kúrdeli shyǵyndardyń 50 paıyzyna deıingi mólsherde qaıtarymsyz úlestik granttar beriledi.

Qurylys jumystary operatorlardyń óz qarajaty esebinen júrgiziledi. Salynǵan ınfraqurylym olardyń teńgeriminde qalady.

Qatysýshylardy irikteý teń qoljetimdilik, ashyqtyq jáne eseptilik qaǵıdattaryn saqtaı otyryp, ashyq konkýrs negizinde júzege asyrylady.

Aıta keteıik, bıyl qazaqstandyqtar ushaq bortynda ınternet paıdalana bastaıdy.