Qazaqstan–AQSh baılanysy: $17 mlrd kelisimder iske asý kezeńinde
ASTANA. KAZINFORM — Premer-mınıstr Oljas Bektenov AQSh-tyń Qazaqstandaǵy elshisi Djýlı Stafftpen kezdesti. Bul týraly Úkimettiń baspasóz qyzmeti habarlady.
Premer-mınıstr Oljas Bektenov Amerıka Qurama Shtattarynyń Qazaqstan Respýblıkasyndaǵy Tótenshe jáne ókiletti elshisi Djýlı Stafftpen saýda-ekonomıkalyq jáne ınvestıtsııalyq yntymaqtastyqty odan ári damytý, tsıfrlandyrý, jasandy ıntellekt jáne ǵarysh salasyndaǵy ózara is-qımyl máselelerin talqylady.
Qazaqstan Respýblıkasynyń Prezıdenti Qasym-Jomart Toqaevtyń AQSh-qa saparynyń qorytyndysy boıynsha qol jetkizilgen ýaǵdalastyqtardyń júzege asyrylý barysy qaraldy.
Premer-mınıstr Oljas Bektenov Prezıdent Qasym-Jomart Toqaevtyń ótken jyldyń qarasha aıyndaǵy Vashıngtonǵa sapary elder arasyndaǵy ekonomıkalyq áriptestiktiń aýqymyn aıqyn kórsetkenin atap ótti. Jalpy somasy $17 mlrd bolatyn qol qoıylǵan 29 kelisim ekonomıkalyq baılanystardyń keńeıýine eleýli serpin berdi. Qazaqstan Úkimeti qol jetkizilgen ýaǵdalastyqtardy júzege asyrýǵa basymdyq beredi.
— Qazaqstan-Amerıka yntymaqtastyǵy búginde qarqyndy damyp keledi. Onyń negizinde strategııalyq kózqarasy bizdiń birlesken jumysymyzǵa praktıkalyq sıpat beretin qos el kóshbasshylary arasyndaǵy berik qarym-qatynas jatyr. Biz joǵary saıası deńgeıdegi tyǵyz dıalog elderimizdiń arasyndaǵy saýda-ekonomıkalyq baılanystardy tereńdetý úshin odan ári qolaıly jaǵdaı týǵyzady dep senemiz, — dep atap ótti Oljas Bektenov.
— Bizdiń elder arasynda buryn-sońdy bolmaǵan qatynastar qalyptasty. Qazaqstan Prezıdenti Qasym-Jomart Toqaev AQSh Prezıdenti Donald Tramptyń Beıbitshilik keńesi jáne Ibrahım kelisimderi jónindegi bastamasyna qatysty naqty ustanymyn bildirdi. Munyń barlyǵy da taıhı ári serpindi bastamalar. Qoldaý kórsetkeni úshin Amerıka Qurama Shtattary men Prezıdent Tramp Qazaqstanǵa alǵys bildiredi, — dep atap ótti Djýlı Stafft.
2025 jyldyń qorytyndysy boıynsha eki el arasyndaǵy taýar aınalymy $3,19 mlrd-qa jetti, al 2026 jyldyń qańtar-aqpan aılarynda $487,4 mln boldy. Kezdesýde AQSh-tyń Qazaqstan ekonomıkasyndaǵy negizgi strategııalyq ınvestorlardyń biri retindegi mańyzy atap ótildi. Qazirgi ýaqytta elimizde amerıkalyqtardyń qatysýymen 600-den astam kompanııa tabysty jumys istep jatyr. Qazaqstandyq naryqta Chevron, ExxonMobil, Amazon, Citi, Wabtec, John Deere, Boeing, Oracle, PepsiCo jáne Mars sııaqty kompanııalardyń bolýy ekijaqty saýda-ekonomıkalyq yntymaqtastyqtyń joǵary áleýetin rastaıdy.
Kezdesý barysynda memlekettik basqarý júıesin odan ári reformalaý men jańartýǵa negiz bolǵan jańa Konstıtýtsııanyń erejelerin júzege asyrýǵa da nazar aýdaryldy. Premer-mınıstr Oljas Bektenov Ata zańymyz saıası turaqtylyqty nyǵaıtyp, memleket pen qoǵamnyń údemeli damýy úshin berik negiz quratynyn atap ótti.
Kezdesý qorytyndysy boıynsha taraptar saýda-ekonomıkalyq áriptestikti odan ári nyǵaıtýǵa, sondaı-aq basym baǵyttar boıynsha birlesken jobalardy júzege asyrýǵa beıildiligin rastady.