«Qazaqstanaeronavıgatsııa» jáne «Ushý qaýipsizdigin qamtamasyz etý ortalyǵy» RMK qyzmetkerleri qaıta qurýdan keıin óz jumys oryndaryn saqtap qalady

Bul týraly «Qazaeronavıgatsııa» RMK ujymymen kezdesý barysynda QR Kólik jáne kommýnıkatsııa vıtse-mınıstri Roman Sklıar málimdedi.

«Qazaqstan Respýblıkasy Úkimetiniń 2013 jylǵy 23 shildedegi № 736 qaýlysyna sáıkes «Qazaeronavıgatsııa» jáne «Ushý qaýipsizdigin qamtamasyz etý ortalyǵy» kásiporyndary «Qazaeronavıgatsııa» bir respýblıkalyq memlekettik kásipornyna biriktirildi. Qaıta qurylǵan kásiporyndardyń qyzmetkerlerimen eńbek kelisimi qaıta jasalady jáne burynǵy áleýmettik mindetter saqtalady» -dep atap ótti Roman Sklıar.

Atalǵan kásiporyndardy qaıta qurý ushý qaýipsizdigin qamtamasyz etý deńgeıin arttyrýǵa baǵyttalǵan jáne bıýdjetten qandaı da bir qosymsha shyǵyndy qajet etpeıdi. Sondaı-aq, kásiporyn qyzmetkerleriniń sany men eńbekaqy kólemi de qysqartylmaıdy.

Jańa kásiporyn «Qazaeronavıgatsııa» RMK men «Ushý qaýipsizdigin qamtamasyz etý ortalyǵy» RMK barlyq mindettemeleriniń quqyqtyq ıelenýshisi bolyp tabylady.

Mınıstrlik baspasóz qyzmetiniń málimetine qaraǵanda, jańadan qurylǵan «Qazaeronavıgatsııa» RMK bazasynda personaldy saqtap qalý jáne nyǵaıtýmen qatar, Kásibı daıarlyq ortalyǵyn qurý josparlanyp otyr. Bul óz kezeginde bolashaqta zamanaýı avıatsııalyq daıarlyq jáne salanyń barlyq qyzmetkerleriniń biliktilikterin arttyrý ortalyǵyn qurýǵa arnalǵan platformanyń rolin atqarmaq.

Sondaı-aq, azamattyq avıatsııanyń medıtsınalyq ortalyǵynyń qyzmetin jaqsartý, atap aıtqanda eýropalyq standarttarǵa kóshý máselesi de óz sheshimin tabatyn bolady.

Kezdesý barysynda vıtse-mınıstr ujymǵa jańadan birikken kásiporynnyń bas dırektorynyń mindeti atqarýshy retinde, buǵan deıin «Qazaeronavıgatsııa» RMK bas dırektorynyń orynbasary qyzmetin atqarǵan Serik Shúlembekovty tanystyrdy.

«Qazaqstan Respýblıkasynyń keıbir zańnamalyq aktilerine kólik máselesi jónindegi tolyqtyrýlar men ózgertýlerdi engizý týraly» QR zańyna 2013 jylǵy 5 shildede engizilgen norma kásiporyndardy qaıta qurýǵa negiz boldy. Atalǵan normaǵa sáıkes, avıatsııalyq qyzmetterdi sertıfıkattaý qyzmeti «Ushý qaýipsizdigin qamtamasyz etý ortalyǵy» RMK-nan QR Kólik jáne kommýnıkatsııa mınıstrliginiń Azamattyq avıatsııa komıtetiniń quzyryna berilgen bolatyn.