Qazaqstan zymyran shabýyly men ǵarysh keńistiginiń jaǵdaıy týraly aqparat alatyn bolady
Bul týraly QR QM baspasóz qyzmeti habarlady. Balqash Toraby Qazaqstan Respýblıkasy men Reseı Federatsııasynyń áskerı qaýipsizdigin qamtamasyz etýde mańyzdy ról atqarady. Qazaqstandyq Balqash Torabynda reseılik zymyran shabýylyn eskertý júıesin berý men ári qaraı paıdalaný jaǵdaıy týraly eki el ókilderi arasyndaǵy ýaǵdalastyqqa 2014 jyldyń 2 jeltoqsanynda qol qoıylǵan bolatyn. Ýaǵdalastyqtyń maqsaty Qazaqstan aýmaǵynda ornalasqan qazaqstandyq Balqash Torabyn berý jáne ári qaraı paıdalanýdyń jańa jaǵdaılaryn aıqyndaý bolyp tabylady. Sonymen birge Reseı Federatsııasy QR memlekettik jáne áskerı basqarý pýnkterine zymyran shabýyly men ǵarysh keńistigin baqylaý júıesi týraly eskertý quralynan aqparat berip otyrady. Bul aqparat zymyrannyń ushý ýaqyty, aýdany, ushyrylýy men qulaýy, zymyrannyń ballıstıkalyq traektorııasy, sondaı-aq bizdiń ǵarysh apparattarynyń ǵarysh obektilerine jaqyndaý qaýpi, janatyn ǵarysh nysandarynyń QR úshin qaýip týdyratyn aýdandarǵa túsýi týraly, QR aýmaǵynda shetel ǵaryshtyq barlaý apparattarynyń ushýy týraly málimettermen qosa ǵarysh keńistigindegi jaǵdaı týraly aqparattar. Budan keıin Balqash Torabyn birge paıdalaný jáne qazaqstandyq áskerı qyzmetshilerdi oqytýdy uıymdastyrý kezeńderine birtindep ótý josparlanǵan. Budan ózge reseılik jaq paıdalanǵan jer ýchaskesiniń (4 myń gektardan aspaıtyn) shekarasyn aıtarlyqtaı qysqartý qarastyrylǵan. Ýaǵdalastyqty bekitý eki memlekettiń qorǵanys qabiletin nyǵaıtyp, qaýipsizdigin qamtamasyz etýge yqpal etedi.