Qazaqstan zııatkerlik básekeniń óńirlik habyna aınaldy
ASTANA. KAZINFORM — Qazaqstan halyqaralyq bilim jáne ǵylym keńistigindegi pozıtsııasyn nyǵaıtyp, oqýshylarǵa arnalǵan bedeldi olımpıadalar men ǵylymı jarystardyń óńirlik ári halyqaralyq ortalyqtarynyń birine aınalyp otyr. bul týraly Oqý-aǵartý mınıstrligi málim etti.
Vedomstvonyń málimetinshe, bul úrdis Memleket basshysy Qasym-Jomart Toqaev aıqyndaǵan bilim men ǵylymdy el damýynyń strategııalyq basymdyǵy retinde damytý jónindegi memlekettik saıasattyń naqty kórinisi. Memlekettik strategııalar aıasynda elimizde daryndy oqýshylardy qoldaý, olardyń ǵylymı-zııatkerlik áleýetin damytý baǵytynda júıeli ári keshendi jumys júrgizilip keledi.
— 2026 jyldyń qańtar-sáýir aılary aralyǵynda Qazaqstanda tórt iri halyqaralyq bilim jáne ǵylym saıysy joǵary deńgeıde uıymdastyryldy. Bul elimizdiń halyqaralyq akademııalyq qaýymdastyqtaǵy bedeliniń turaqty túrde artyp kele jatqanyn aıǵaqtaıdy, — delingen habarlamada.
Almaty qalasynda ótken XXII Halyqaralyq Jáýtikov olımpıadasy matematıka, fızıka jáne ınformatıka pánderi boıynsha álemniń 16 elinen kelgen 600-den astam oqýshyny biriktirdi. Qatysýshylar arasynda Armenııa, Ázerbaıjan, Belarýs, Bolgarııa, Grýzııa, Qazaqstan, Qyrǵyzstan, Mońǵolııa, Pákistan, Reseı, Rýmynııa, Tájikstan, Túrikmenstan, Indonezııa, Úndistan jáne Ózbekstan ókilderi boldy. Jarys qorytyndysy boıynsha 324 medal sarapqa salynyp, qatysýshylardyń joǵary akademııalyq daıyndyǵy kórindi.
Astana qalasynda ótken Alem Tech Fest 2026 festıvali Ortalyq Azııadaǵy eń iri robototehnıka jáne STEM tehnologııalar alańyna aınaldy. Іs-sharaǵa Qazaqstan, Qyrǵyzstan, Ózbekstan, Túrikmenstan, Estonııa, Vetnam jáne Gonkong QHR AÁA-dan 5 myńnan astam oqýshy qatysty. Nátıjesinde Qazaqstannyń ulttyq robototehnıka quramasy jasaqtalyp, 16 úzdik komanda AQSh-ta ótetin FIRST Championship 2026 álemdik fınalyna joldama aldy.
Astana qalasynda 8-12 sáýir aralyǵynda ótken «Ǵylym álemin ashamyz» halyqaralyq ǵylymı konkýrsy 20-ret uıymdastyrylyp, ǵaryshtyq zertteýler salasyndaǵy jas zertteýshilerdi biriktirdi. Qazaqstan, Qytaı jáne Túrkııadan kelgen 200-ge jýyq oqýshy qatysqan baıqaý nátıjesinde 115 júldeger anyqtaldy. Joba jas býynnyń ǵylymı-zertteý qyzmetine qyzyǵýshylyǵyn arttyrýǵa jáne halyqaralyq ǵylymı yntymaqtastyqty nyǵaıtýǵa baǵyttaldy.
Sondaı-aq Astanada ótken Ó. Joldasbekov atyndaǵy halyqaralyq matematıka jáne mehanıka boıynsha zertteý jobalary konkýrsyna Qazaqstan, Taıland jáne Túrkııadan 135 jas zertteýshi qatysty. 99 jobanyń 77-si júldeli oryndarǵa ıe bolyp, halyqaralyq ǵylymı básekelestiktiń joǵary deńgeıin kórsetti.
Osylaısha, Qazaqstan halyqaralyq olımpıadalar men ǵylymı jarystardy ótkizetin óńirlik bilim habyna aınalyp keledi. Bul úderis elimizdiń bilim berý júıesiniń básekege qabilettiligin arttyryp qana qoımaı, qazaq tiliniń halyqaralyq ǵylymı-akademııalyq keńistikte qoldanylý aıasyn keńeıtýge jáne onyń mártebesin nyǵaıtýǵa yqpal etedi.
Aıta keteıik, qazaqstandyq oqýshylar halyqaralyq matematıkalyq olımpıadadan úsh medal jeńip aldy.
