Qazaqstan ziltemirshilerin 1 jylǵa jarystan shettetý jaıynda resmı hat kelgen joq - Meńdihan Tápsir
ASTANA. QazAqparat - Halyqaralyq aýyr atletıka federatsııasy Qazaqstan ziltemirshileriniń 1 jylǵa jarystan shettetiletindigi jaıynda resmı hat joldaǵan joq. Bul týraly QazAqparat tilshisine QR Aýyr atletıkadan memlekettik jattyqtyrýshysy Meńdihan Tápsir málim etti.
«Ázirshe eshteńe aıta almaımyn. Bul sońǵy sheshim emes. Naqty bolmaǵannan keıin pikir bildiretin de jónim joq. Halyqaralyq federatsııa bizdiń federatsııaǵa resmı hat joldaýy tıis. Al onda qujat áli kelmedi», - dedi ol.
Aıta keteıik, IWF basshysy Tamash Aıan Halyqaralyq aýyr atletıka federatsııasy (IWF) Rıo-de-Janeırodaǵy Olımpıada aıaqtalǵannan keıin Reseı, Qazaqstan, Belarýs aýyr atletıka federatsııasyn bir jylǵa jarysqa qatysý quqyǵynan aıyratyndyǵyn málim etken bolatyn.
Este bolsa, 22 maýsymda IWF atqarýshy komıteti sportshylary dopıng qoldanǵan elderdiń federatsııalaryna qatysty qaýly qabyldady. Atalǵan qujatqa sáıkes, 2008 jáne 2012 jylǵy olımpıadalarǵa qatysqan ziltemirshilerinen úsh nemese odan kóp dopıng synama oń kórsetkish kórsetken elder bir jylǵa jarysqa qatysý quqyǵynan aıyrylady. Oǵan Reseı, Qazaqstan, Belarýs iligýi yqtımal.
