Qazaqstan jyl sońyna deıin aqshyl munaı ónimderine eksporttyq kedendik bajdy arttyrady
ASTANA. QazAqparat - Búgin Parlament Senaty Ekonomıkalyq saıasat, ınnovatsııalyq damý jáne kásipkerlik komıtetiniń keńeıtilgen otyrysy bolyp ótti.
Onda «2010 jyly 9 jeltoqsanda Qazaqstan Respýblıkasynyń Úkimeti men Reseı Federatsııasy Úkimeti arasyndaǵy Qazaqstan Respýblıkasyna munaı jáne munaı ónimderin jetkizý salasyndaǵy saýda-ekonomıkalyq yntymaqtastyq týraly kelisimge ózgerister engizý týraly hattamany ratıfıkatsııalaý týraly» zań jobasy talqylandy.
Toqtala ketetin jaıt, Qazaqstan men Reseı arasyndaǵy Qazaqstanǵa munaı jáne munaı ónimderin jetkizý salasyndaǵy saýda-ekonomıkalyq yntymaqtastyq týraly kelisimge ózgerister engizilgen hattama 2013 jyldyń 24 jeltoqsanynda Máskeýde jasalǵan bolatyn.
Hattamanyń negizgi maqsaty Qazaqstannyń 2012-2013 jyldar aralyǵynda Reseıge munaı jetkizý jónindegi mindettemelerin oryndaýdy aıaqtap, Pavlodar munaı-hımııa zaýytyn reseılik munaımen qamtamasyz etý, sondaı-aq Qazaqstannyń ishki naryǵyn tutynýdy jabýǵa qajetti mólsherde Reseıde óndirilgen joǵary oktandy benzındermen jáne avıakerosındermen úzdiksiz qamtamasyz etý bolyp tabylady. Bul rette 2014 jyldyń 1 qańtarynan bastap Qazaqstanǵa jetkizilgen munaı ónimderi úshin Reseıge munaıdy qarsy jetkizý júzege asyrylmaıtyny qarastyrylǵan.
Hattamaǵa sáıkes, 2012 jyldyń 1 qańtarynan bastap 2013 jyldyń 31 jeltoqsanyna deıingi kezeńde Qazaqstan Respýblıkasyna ákelingen munaı ónimderi úshin Reseı Federatsııasyna munaı jetkizý tártibi Qazaqstanǵa ákelinetin munaı ónimderi úshin Reseı Federatsııasyna munaı jetkizý ádistemesimen belgilengen. Sonymen qatar, hattamanyń erejelerine sáıkes, Qazaqstan 2014 jylǵy 31 jeltoqsanǵa deıin aqshyl munaı ónimderine eksporttyq kedendik bajdardy arttyrady jáne 2014 jylǵy 1 qańtardan bastap Keden odaǵynyń keden aýmaǵynan tysqary jerlerge aqshyl munaı ónimderiniń áketilýine tyıym salynady. Al Reseı Federatsııasy 2014 jylǵy 1 qańtardan bastap Qazaqstan Respýblıkasyna Reseı Federatsııasynan jetkiziletin munaı ónimderine kedendik deklaratsııalaýdy belgileıdi jáne Qazaqstan Respýblıkasyna Reseı Federatsııasynan qoshqyl munaı ónimderin ákelýge tyıym salady.
Zań jobasy palatanyń jalpy otyrysyna shyǵarylatyn bolady.
