Qazaqstan jyl saıyn 20 ózbekstandyqty óz JOO-larynda oqytýǵa nıetti

ASTANA. QazAqparat – Qazaqstan men Ózbekstan Úkimetteri arasyndaǵy joǵary jáne joǵary oqý ornynan keıingi bilim salasyndaǵy yntymaqtastyq týraly kelisim jobasy jarııalandy, dep habarlaıdy QazAqparat tilshisi.

Qujatta kórsetilgendeı, taraptar damytýǵa múddeli bilim salasyndaǵy basym baǵyttar:

- stýdenttermen, oqytýshy-professor quramymen, ǵylymı qyzmetkerlermen almasý;

- joǵary jáne joǵary oqý ornynan keıingi bilim berý uıymdarynyń arasyndaǵy yntymaqtastyqty keńeıtý jáne tereńdetý;

- oqytýshylar men mamandardy, ǵylymı-pedagogıkalyq kadrlar men ǵylymı qyzmetkerlerdi daıarlaý, qaıta daıarlaý jáne biliktiligin arttyrý;

- birlesken ǵylymı zertteýler júrgizý.

Kelisimge sáıkes, eki eldiń jýapty vedomstvolary óz bilim alýyshalaryna taraptardyń JOO-larynda ótetin konkýrstar men olımpıadalarǵa qatysýyna múmkindik beredi.

«Taraptar Qazaqstan Respýblıkasynyń joǵary bilim berý mekemelerinde ózbek tilin, ádebıeti men mádenıetin jáne Ózbekstan Respýblıkasynyń joǵary bilim berý mekemelerinde qazaq tilin, ádebıeti men mádenıetin oqyp-úırenýge jáne oqytýǵa qoldaý kórsetedi.

Taraptar jyl saıyn balamaly negizde sany 20 adamǵa deıin bilim alýshylarmen almasýdy júzege asyrady, onyń ishinde bakalavrıat baǵdarlamalary boıynsha – 14 adam jáne magıstratýra baǵdarlamalary boıynsha – 6 adam.

Qabyldaýshy tarap bilim alýshylardy oqý quraldaryn, ǵylymı-tehnıkalyq qujattamany, zertteý jabdyǵyn paıdalanǵany úshin tólemaqydan bosatady. Sonymen qatar óz memleketiniń azamattarymen teń jaǵdaıda, joǵary oqý ornynyń jataqhanasynda turýyn qamtamasyz etedi», - delingen qujatta.

Bul kelisimge Qazaqstan Úkimeti atynan qol qoıý ókilettiligi Ǵylym jáne joǵary bilim mınıstri Saıasat Nurbekke beriledi.

Quajatty ashyq talqylaý 23 qarashaǵa deıin jalǵasady.