Qazaqstan jurtshylyǵy Ult Kóshbasshysyna senedi
1991 jyldyń 1 jeltoqsanynda Qazaqstan tarıhynda alǵashqy ret jalpyhalyqtyq Prezıdent saılaýy ótkizilip, Nursultan Ábishuly Nazarbaev saılaýshylardyń basym daýysyn jınap, Qazaqstan Respýblıkasynyń Prezıdenti bolyp saılandy.
Memleket basshysynyń elimizdi aıaǵynan nyq turǵyzyp, álemge tanytýdaǵy eńbegi ushan-teńiz. Egemendigimiz arqasynda tarıhymyz túgendelip, tilimiz, dinimiz qaıta oralyp, memleketimizdiń ulttyq rámizderi qabyldandy. Eń bastysy, memlekettik shekaramyz aıqyndalyp, eldiń tutastyǵy, jerdiń bútindigi qamtamasyz etildi. Qazirgi kúni keń-baıtaq elimizde Elbasynyń bastamasymen atqarylyp jatqan ıgi ister táýelsiz Qazaqstannyń asqaraly bıikterden kórine berýine yqpal eteri anyq. Qazaqstan jurtshylyǵy ózi tańdaǵan Kóshbasshysyna senedi!
Kúni keshe elimizge resmı saparmen Ózbekstan Respýblıkasynyń Prezıdenti Islam Karımov keldi. Kezdesýge oraı ótken alqaly jıynda Islam Karımov memleketaralyq yntymaqtastyq aıasyndaǵy máselelerdi tilge tıek ete kele, Elbasy Nursultan Nazarbaevtyń kóregendilik saıasatyn erekshe atap ótip, óziniń joǵary baǵasyn bergeni belgili. 1-jeltoqsan - Tuńǵysh Prezıdent kúni qarsańynda bolǵan eki jaqty resmı kezdesýden keıin biz elimizdiń sara jolyn taǵy bir márte oı eleginen ótkizýdi jón kórdik.
Elbasynyń memleketimizdi órkendetý jolyndaǵy syndarly saıasaty búginde kóptegen memleketter úshin úlgi bolýda. Qazirgi tańda álemdik qaýymdastyq Qazaqstannyń ustanǵan baǵytyn, halyqaralyq baǵyttaǵy qol jetkizgen jetistikterin moıyndap, bilip otyr. Táýelsizdik alǵan jyldardan beri alyp qaraıtyn bolsaq, elimizde Elbasynyń syndarly saıasatynyń arqasynda kóptegen iri reformalar, onyń ishinde áleýmettik-ekonomıkalyq, saıası-mádenı, rýhanı salalardaǵy mańyzdy sharýalar atqarylǵany sózsiz. Saıası sarapshylar Qazaqstannyń az ýaqyttaǵy jetistikterin eldegi turaqtylyq, ultaralyq dostyq pen toleranttylyqpen baılanystyrady. Munyń erekshe máni bar. Sebebi turaqtylyqty óz damýynyń negizi etip almaǵan eldiń bolashaǵy da bulyńǵyr bolatyny aıdan anyq. Táýelsizdigimizdiń alǵashqy jyldarynan-aq halyqtyń aýyzbirshiligine, yntymaǵyna, bekem dostyǵyna mán berip, birlikti órkendeýimizdiń basty qaǵıdasy retinde qalyptastyra bilgen Elbasynyń sarabdal saıasatynyń ómirsheńdiligi álem qaýymdastyǵy tarapynan moıyndalyp otyr.
Qazaqstan egemendiginiń ár kezeńinde jarqyn bolashaqtyń bastaýy retinde jasampazdyq jolyn tańdady. Árıne, jas memleketimizdiń ózge elderden úıreneri kóp edi. Elimizge ınvestıtsııalar tartý, ulttyq kapıtaldy qalyptastyrý, ekonomıkany ilgeriletý, kórshiles memlekettermen áriptestik baılanystar ornatý syndy keshendi is-sharalarǵa basa mán berilgeni sózsiz. Erekshe atap óterligi, elimizge álemdik qaýymdastyqta óz ornyn aıqyndaı bildi. Memleket basshysynyń kóregendi saıasatyn dúnıejúzi elderiniń kóshbasshylary, belgili saıasattanýshylar joǵary baǵalady. Máselen, AQSh Prezıdenti Barak Obama: «Sizdiń elińiz egemendi, turaqty jáne órkendegen memleket retinde óziniń damýynda mańyzdy tabystarǵa qol jetkizdi. Men Qazaqstanǵa Aýǵanstandaǵy turaqtylyq pen qalpyna keltirý isindegi ustanymy úshin rızashylyǵymdy bildiremin jáne men Sizdiń ultaralyq jáne dinı tózimdilikti ilgeriletý jónindegi kúsh-jigerińizdi joǵary baǵalaımyn» dese, Reseı Prezıdenti Vladımır Pýtın «Qazaqstan halqy óziniń áleýmettik-ekonomıkalyq jáne memlekettik qurylystaǵy qol jetken tabystaryn oryndy maqtan ete alady. Respýblıkanyń halyqaralyq bedeli jyldan-jylǵa artyp keledi, qoǵamdaǵy ultaralyq qatynastar da jetildirile túsýde. Reseı men Qazaqstan halyqaralyq arenadaǵy, Eýrazııa keńistigindegi aımaqtyq ıntegratsııalyq qurylymdardaǵy kúshterin úılestirýi óziniń tıimdiligin kórsetti» degen bolatyn. QHR-dyń burynǵy Tóraǵasy Hý Tszıntao Elbasyna arnaǵan lebizinde: «Táýelsizdik jyldary Sizdiń basshylyǵyńyzben eńbeksúıgish te aqylman Qazaqstan halqy óziniń qajyrly da jasampaz eńbegimen damýdyń durys jolyn taba bildi. Búginde Qazaqstanda ekonomıka turaqty damý ústinde, halyqtyń ál-aýqaty artyp, qoǵamnyń áleýmettik-saıası turaqtylyǵy saqtalyp otyr. Sońǵy jyldary Qytaı - Qazaqstan qatynastary belsendi damýda» deıdi. Álem elderi kóshbasshylarynyń mundaı sózderi Elbasynyń bıik parasatyn jan-jaqty baıqatyp turǵany sózsiz. Álemdik saıasatta memleketter men memleketter arasyndaǵy básekelestik bolmaı turmaıtyny zańdylyq. Ár el óziniń múddesin kóziniń qarashyǵyndaı qorǵaýǵa tyrysady. Bul oraıda Qazaqstannyń kópvektorly saıasaty - bizdiń HHІ ǵasyrdaǵy damý jolymyzdy aıqyndaǵany anyq. Elbasy jáne Astana. Ult kóshbasshysynyń kóregendik saıasatyn taǵy bir qyrynan aıqyndaǵan ǵalamat joba - ásem kelbetti Astanamyzdyń arqa tósinde boı kóterýi edi. Astana búginde Qazaqstannyń astanasy ǵana emes, dúnıejúzi boıynsha mańyzdy sharalar ótkizilip kele jatqan rýhanı ortalyqqa aınaldy. Astana qalasyna kelgen saparlarynda ózge elderdiń basshylary onyń mańyzyna aıryqsha toqtaldy. Máselen, Túrkııanyń Prezıdenti bolǵan Abdýlla Gúl: «Ár kelgenimde gúldene túskenine kýá bolyp júrgen Astana qalasy - Qazaqstannyń dınamızmi men Prezıdent Nazarbaev myrzanyń kóregendiligin beıneleıtin eń úlken týyndy. Astananyń qurylys jumystaryna túrik fırmalary men jumysshylarynyń da úles qosýyn túrik-qazaq yntymaqtastyǵynyń eń ásem nyshandarynyń biri dep bilemiz» dep erekshe tebirene sóılegeni jurt esinde. Búgingideı álemdegi almaǵaıyp kezeń ár memleket úshin úlken syn ekeni belgili. Qarjylyq daǵdarys saldary alpaýyt memleketterdiń ózine soqqy bolyp tıdi. Keıbir memleketterde áleýmettik máseleler kún tártibine shyqty. Qazaqstan Elbasynyń salıqaly saıasatynyń arqasynda álemdik daǵdarystyń ulttyq ekonomıkamyzǵa sonshalyqty kúshti qarqynmen áser etýine jol bermedi. Indýstrııaldyq-ınnovatsııalyq jobalarymyz iske qosylyp, jańadan jumys oryndary ashyldy. Memleket basshysy jurtshylyqpen júzdesýlerinde, óziniń ár Joldaýynda Qazaqstan jetistiginiń basty negizi ol halyqtyń birligi ekenin aıtyp keledi. Tek birlik arqyly biz barlyq qıyndyqtardy jeńerimiz sózsiz. Qyrǵyzstan Respýblıkasynyń Prezıdenti Almazbek Atambaev Qazaqstanǵa resmı saparmen kelgen ýaqytynda «Bizde mynadaı mátel bar: «Qolda barda altynnyń qadiri joq». Óz ortamda aıtyp júremin, men Nazarbaevtyń bizdiń elde tuńǵysh Prezıdent bolmaǵanyna únemi ókinish bildiremin. Sizder óz Prezıdentterińizdi qurmetteńizder, qadirleńizder. Qazaqstan qol jetkizgen turaqtylyqty qadirleńizder, gúldenýdi baǵalańyzdar» dedi. Bul sózde, bile bilsek, tereń mán bar. Óıtkeni elimizdiń búgingi jetistikteri, kemel keleshegi Memleket basshysynyń syndarly saıasatynyń nátıjesinde ekeni shyndyq.
