Qazaqstan jýrnalısteriniń «energetıkalyq pýly» jasaqtalýda
ASTANA. QazAqparat - Qazaqstandyq MedıaAlıans pen QR Energetıka mınıstrligi energetıka taqyrybyna mamandanǵan jýrnalıster arasynan "energetıkalyq pýl" qurady, dep habarlaıdy QazAqparat.
Qazaqstandyq MedıaAlıans (QMA) quzyrly, obektıvti jýrnalıstıkany damytý men BAQ qyzmetkerleriniń kásibı deńgeıin kóterýdi óz jumysynyń negizgi baǵyttarynyń biri dep jarııalaǵan bolatyn.
Munyń barlyǵy jýrnalıstermen júıeli ári tyǵyz jumysty, olardyń qandaı da bir taqyryp boıynsha bilim kókjıegin keńeıtýdi talap etedi.
Osy oraıda MedıaAlıans QR Energetıka mınıstrligimen birlesip, kóp qyrly jáne kúrdeli energetıka taqyrybyna mamandanǵan respýblıkanyń bilikti jýrnalısterinen sapaly jáne mobıldi "energetıkalyq pýl" qurý jumystaryna kirisedi.
Aktsııanyń alǵashqy kezeńinde qazaqstandyq jýrnalıster men blogerlerden ótinimder qabyldanyp, irikteledi. Strategııalyq mańyzdy jáne qashanda ózekti energııa taqyrybyna ózin beıim dep esepteıtin mamandar QMA resmı saıtyna myna qujattardy jibere alady:
- irikteýge qatysýǵa ótinim;
- ózi týraly tolyq túıindeme;
- atalǵan taqyryp boıynsha kez kelgen janrdaǵy shyǵarmashylyq jumystary.
Bastapqy irikteýden ótken BAQ ókilderi ekinshi kezeńde mınıstrlik basshylyǵynyń baspasóz jáne blog-týrlaryna, baspasóz brıfıngterine shaqyrylady. Sonymen birge, QR Energetıka mınıstrligi men QMA belgili salalyq jýrnalısterdiń, respýblıkalyq BAQ jetekshileriniń qatysýymen oqytý semınarlaryn uıymdastyrady.
Ótinim, túıindeme jáne shyǵarmashylyq jumystar 2018 jyldyń 20 naýryzyna deıin qabyldanady.
Eske sala keteıik, ótken aptada elordada qazaqstandyq MedıaAlıans (QMA) ókilderi, respýblıkalyq BAQ basshylary men blogerler QR Energetıka mınıstrliginiń basshylyǵymen kezdesti. Onda mınıstr Qanat Bozymbaev BAQ pen PR-qurylym qyzmetkerleriniń kásibı deńgeıin arttyrý, sapaly jýrnalıstik salany damytý boıynsha arnaıy kýrstar uıymdastyrý ıdeıasyn usynǵan edi.
Óz kezeginde MedıaAlıans atalǵan taqyrypqa mamandanǵan jýrnalısterdiń mobıldi "energetıkalyq pýlyn" qurýda kómek kórsetýge daıyn ekendikterin jetkizdi.
Sonymen birge, taraptar energetıka salasyndaǵy strategııalyq mańyzy bar iri nysandarǵa keńeıtilgen press-týrlar uıymdastyrýǵa, onda 2-3 kúndik oqytý semınarlaryn ótkizýge ýaǵdalasty. Mundaǵy maqsat - "mınıstrlik pýly" úmitkerlerin iriktep alý, oqytý jáne tájirıbede shyńdaý.
