Qazaqstan jýrnalısterine 12 eldi tegin aralaý múmkindigi týyp tur

ASTANA. QazAqparat - Jýrnalıster arasynda ótetin «Samǵaý» ulttyq konkýrsynyń jeńimpazdary Qazaqstanda shyǵarylǵan taýarlardyń kórmesimen birge álemniń 12 elin tegin aralaı alady.

Bul týraly búgin Ortalyq kommýnıkatsııalar qyzmetinde  ótken brıfıng barysynda «Halyq markasy» taýarlarynyń sapasyn baqylaıtyn federatsııa prezıdenti Rımma Tájibaeva málim etti.

«Kelesi jyldyń aqpan-naýryz aılarynda «Qazaqstanda jasalǵan - Halyq markasy» kórmesin uıymdastyrý josparlanǵan. Astanada uıymdastyrǵan «Halyq markasy» atty pavılonda úzdik dep tanylǵan ónimder osy halyqaralyq kórmege qatysady. Kórme aıasynda Reseı, Grýzııa, Armenııa, Ázerbaıjan, Ýkraına, Taıland, Mysyr, Qytaı, Túrkııa, BAÁ, Indııa elderin aralaýdy josparlap otyrmyz. Al, «Samǵaý» konkýrsy aıasynda jeltoqsan aıynda jeti nomınatsııa boıynsha 14 oblys pen 2 qaladan marapattalǵan jýrnalıster bizben birge osy 12 eldi tegin aralaıdy», - dep habarlady Rımma Tájibaeva.

Qazir «Samǵaý» konkýrsyna Qazaqstannyń óńir-óńirinen 70 adam ótinish bildirgen. Sonyń ishinde jeti adam - sheteldik BAQ ókili. Buryn habarlaǵanymyzdaı, konkýrs jeńimpazdary  atalymdar boıynsha 25 baǵaly syılyqqa ıe bolady. Bas júlde - Qazaqstanda qurastyrylǵan kólik.

Bas redaktorlar klýbynyń tóraıymy Bıbigúl Jeksenbaıdyń aıtýynsha, baıqaýdy elimizdegi belgili qoǵam qaıratkerleri baǵalaıdy.