Qazaqstan jýrnalısteri «Parlament sózi» syılyǵymen marapattaldy
ASTANA. QazAqparat - Búgin Parlament Májilisi buqaralyq aqparat quraldary ókilderin «Parlament sózi» syılyǵymen marapattady, dep habarlaıdy QazAqparat.
«Ár memlekette, ár qoǵamda jýrnalısterdiń orny óte mańyzdy ári zor. Sondyqtan Elbasy Nursultan Ábishuly Nazarbaev Táýelsizdiktiń birinshi kúnderinen bastap baspasóz salasynyń damýyna erekshe kóńil bólip keledi. Sonyń nátıjesinde bizdiń buqaralyq aqparat quraldarymyz tek elimizde ǵana emes, halyqaralyq, álemdik deńgeıde jyldam aqparat jetkizýshi bolyp tabylady. Árıne, ózderińiz sııaqty daryndy, qabiletti, tájirıbeli mamandardyń eńbekteriniń arqasynda. Sizder kún demeı, tún demeı elimizde atqarylyp jatqan barlyq jumystardy kórsetý úshin aıanbaı qyzmet jasap kelesizder. Sol arqyly 25 jyl ishinde barlyq jumysty barsha álemge, el ishine jetkizip, damý jolyna zor úles qosýdasyzdar»,-dedi Májilis tóraǵasy Nurlan Nyǵmatýlın BAQ ókilderin tól merekelerimen quttyqtaý kezinde.
Osy oraıda Májilis tóraǵasy Parlament jumysyn kórsetýge eńbek sińirgen tilshiler qaýymyna barlyq depýtattardyń atynan alǵysyn bildirdi.
«Bul aýyr ári jaýapkershiligi zor mańyzdy qyzmette sizderge tek qana shyǵarmashylyq tabystar tileımiz»,-dedi Nyǵmatýlın.
Bıylǵy jyly «Parlament sózi» syılyǵy alǵash ret tapsyryldy. Parlamenttik syılyqpen palata depýtattarynyń zań shyǵarý qyzmetin teledıdar, merzimdik baspasóz betterinde jáne aqparattyq agenttikter men radıoda úzdik jazyp, kórsetkender marapattalady. Sonymen qatar, Qazaqstan parlamenttik jýrnalıstıkasynyń damýy men órkendeýine úles qosqandar da eskerildi. Májilis tóraǵasy Nurlan Nyǵmatýlın ótken sessııanyń aıaǵynda jýrnalısterge arnalǵan syılyq belgileý boıynsha Májilis Bıýrosynyń sheshimin jarııalaǵan bolatyn.
«Bir jyl buryn osy zalda kezdesken kezde men depýtattardyń atynan sizderge ýáde bergen edim, ıaǵnı jyl saıyn BAQ ókilderiniń kásibı merekesiniń aldynda Májilistiń jumysyn tolyq kórsetken úshin birneshe atalymdar boıynsha syıylyqtar uıymdastyratynymyzdy aıttym. Mine, búgin bul ýádeni oryndap jatyrmyz. «Parlament sózi» degen ataýdyń úlken maǵynasy bar. Sebebi sózge toqtaý, sózdi baǵalaý men qadirleý ata-babalarymyzdan kele jatqan qasıetti jol»,-dedi ol.
Atalǵan syılyq aıasynda 6 atalym boıynsha marapattaý júrgizildi. Jalpy, osy atalymdarǵa qatysýǵa 80-ge jýyq ótinim kelip túsken. Jeńimpazdarǵa dıplomdarmen qatar, arnaıy daıyndalǵan esklıýzıvti músinsheler de tapsyryldy.
Sonymen, «Parlamenttik jýrnalıstıkaǵa qosqan úlesi úshin» atalymynda kórnekti jazýshy, belgili jýrnalıst, bilikti aýdarmashy Sarbas Aqtaev marapattaldy. Sonymen qatar osy atalymdaǵy syılyq tanymal jýrnalıst ıÝrıı Tarakovke de tapsyryldy.
«Úzdik televızııalyq sıýjet» atalymynda «Habar» telearnasynyń tilshisi Ashat Nııazov pen «Qazaqstan» telearnasynyń tilshisi Indıra Asanova laýreat dep tanyldy.
«Úzdik baspa jarııalanymy úshin» atalymynda «Kazahstanskaıa pravda» gazetiniń parlamenttik sholýshysy Laýra Túsipbekova men «Aıqyn» gazetiniń tilshisi Aıhan Shárip jeńimpaz atandy. 
«Úzdik ınternet jáne radıo materıal úshin» atalymynda syılyq Qazaq radıosynyń ujymy men («Zakon.kz») Oksana Skıbanǵa berildi.
Sonymen qatar «Arnaıy reportaj» atalymynda laýreattar bolyp «Informbıýro» aqparattyq portalynyń tilshisi Igor Mosýnov, «Astana» telearnasynyń tilshisi Aıgúl Shaıhımova jáne «Habar 24» jańalyqtar qyzmetiniń ujymy ataldy.
Munymen qosa, «Parlament sózi» syılyǵynyń «Úzdik vıdeo jáne foto materıal» atalymynda «KTK» telearnasynyń operatory Vladıslav Vodnev pen «Egemen Qazaqstan» gazetiniń fototilshisi Erlan Omarov marapattaldy.
