Qazaqstan jýrnalısteri kásibı ómirlerinde bolǵan qyzyqty estelikter kitabyn shyǵardy
ASTANA. 26 maýsym. QazAqparat - Aqparat jáne muraǵat komıteti Astanada «Solaı bolǵan» jáne «Byl slýchaı» atty Qazaqstan jýrnalısteriniń estelikter serııasynyń alǵashqy ujymdyq jınaǵynyń tusaýkeserin ótkizdi.
Ushqyr qalam ıeleriniń kásibı merekesine oraı shyǵarylǵan kitaptarda elimizdiń tanymal tilshileriniń kásibı ómirbaıandarynda oryn alǵan keleńsiz ári ezý tartqyzar oqıǵalar, gazetke nemese telereportajdarǵa enbeı qalǵan, alaıda shyǵarmashylyq jol qandaı bolatynyn, jedel aqparatty alýdyń qıyndyqtaryn ashyp kórsetetin epızodtar engen.
QR Mádenıet jáne aqparat mınıstri Darhan Myńbaıdyń atap ótkenindeı, basylym baılanys jáne aqparat salasy qyzmetkerleriniń kúnine arnalyp shyǵaryldy.
«Atalmysh kitapta sizder jaqsy tanıtyn jýrnalısterdiń ómirinde oryn alǵan óte qyzyq oqıǵalar usynylǵan. Jınaqty ári qaraı úzbeı jarııalaýǵa bolady. Eger sizderdiń taǵy da jańa oılaryńyz bolsa, jobany kelesi jyly jasap shyǵarý múmkindikterińiz bar», - dep atap kórsetti mınıstr kitaptardyń tusaýkeser rásiminde.
Kitapty Qazaqstannyń ataqty jýrnalısteri - QR Bas redaktorlar klýbynyń músheleri qurastyrdy.
