Qazaqstan jýrnalıster akademııasynyń «Altyn juldyz» jáne «Altyn samuryq» syılyǵy laýreattarynyń esimderi ataldy
ALMATY. 20 qarasha. QazAqparat - Búgin Almatyda Qazaqstan jýrnalıster akademııasynyń «Altyn juldyz» jáne «Altyn samuryq» syılyǵynyń laýreattary marapattaldy.
Bul shara «Qazaqstannyń medıa naryǵy: ońtaıly basqarý jáne damytatyn tustary» degen taqyryppen ótip jatqan 5-shi medıa quryltaıda júzege asty.
«Álıhan Bókeıhanovtyń jýrnalıstik murasynyń beımálim betterin ashyp, rýhanı murasynyń 7 tomdyq shyǵarmalar jınaǵyn shyǵarǵany úshin Chehııadan Sultan Aqqululy «Altyn juldyz» syılyǵymen marapattalady. Bul syılyq Qazaqstannyń búkil demokratııalyq baspasóziniń qarlyǵashy «Qazaq» gazetiniń 100 jyldyǵy qarsańynda berilip otyr. Al ekinshi «Altyn juldyz» syılyǵy «Edelveıs» baspa úıiniń negizin qalap, uıymdastyrǵan Vıktor Zabotkınge beriledi», - dedi Qazaqstan jýrnalıster akademııasynyń prezıdenti Saǵymbaı Qozybaev. Sondaı-aq, akademııa prezıdentiniń ataýly júldesi «Altyn samuryq» syılyǵyna «Otandyq jýrnalıstıkadaǵy ólsheýsiz úlesi úshin» «Mysl» jýrnalynyń bas redaktory Seıdahmet Quttyqadam ıe boldy. Buǵan deıin «Altyn samuryq» syılyǵyna Marat Barmanqulov, Iosıf Býdnevıch, Qýanysh Sultanov, Ǵadilbek Shalahmetov, Gerold Belger, Altynbek Sársenbaev, Ánýar Álimjanov, Hasen Oraltaı, Armanjan Baıtasov, Dúkesh Báıimbetov sııaqty taǵy basqa da tulǵalar ıe bolǵan edi.
