Qazaqstan júrgizýshileri kólikti senimhatsyz basqaratyn boldy
ASTANA. QazAqparat - Qazaqstan júrgizýshileri kólikti senimhatsyz basqaratyn boldy. Bul týraly búgin Astanadaǵy baspasóz máslıhatynda QR ІІM Ákimshilik polıtsııa komıtetiniń basqarma basshysy Qaısar Sultanbaev málim etti.
Atap aıtqanda, endi senimhat joıylǵanymen kólikti kim bolsa, sol aıdap kete beredi degen sóz emes. Avtokóliktiń saqtandyrý polısine aty-jóni jazylǵan tulǵalar ǵana ony basqarýǵa quqyly bolady.
Aıta keteıik, 2015 jyldyń 1 qańtarynan bastap «Qazaqstanda kásipkerlik qyzmet úshin jaǵdaıdy jaqsartý jónindegi túbegeıli sharalar týraly QR keıbir zańnamalyq aktilerine ózgertýler men tolyqtyrýlar engizý týraly» Zańy kúshine endi. Osy oraıda jol júrý zańyna da ózgerister engizildi. Bul zańnamada kólikti basqarýǵa qajetti senimhat qujattar tiziminen alynyp tastalyp otyr.
«Tehpasport, kólik quralyn tirkeý týraly kýáligin jáne saqtandyrý polısin alyp, júre beredi. Bizdiń qyzmetkerler avtokólikti toqtatyp, ony tekseretin bolsa, bizde qazir barlyq tehnıkalyq jaǵdaılar bar. Sol boıynsha tekserip, kimniń avtókóligi ekenin, azamattyń kólikti zań júzinde basqaryp júrgendigin anyqtaýǵa bolady»,- dep túıdi Q. Sultanbaev.
