Qazaqstan jumysshy kadrlardy daıarlaýda álemdik deńgeıge shyqty

ASTANA. KAZINFORM – Memleket basshysy jarııalaǵan Jumysshy mamandyqtar jyly aıasynda qazaqstandyq kolledjderdi ınternatsıonaldandyrý júrgizilýde. Bul – TjKB júıesin transformatsııalaýdaǵy basym baǵyttardyń biri, dep habarlaıdy QR Oqý-aǵartý mınıstrliginiń baspasóz qyzmeti.

Qazirgi ýaqytta salalyq vedomstvo sheteldik seriktestermen kelissózder júrgizýde. Olardyń qatarynda Qytaı, Ońtústik Koreıa, Frantsııa sekildi elderdiń jetekshi bilim berý uıymdary men kásiporyndary bar. Yntymaqtastyq aıasynda akademııalyq utqyrlyqqa, taǵylymdama men tájirıbe almasý baǵdarlamalaryna, halyqaralyq bilim berý standarttaryn, qos dıplom alý baǵdarlamalaryn engizýge, sondaı-aq pedagogterdiń kásibı quzyrettiligin arttyrýǵa erekshe kóńil bólinýde.

«Jumysshy mamandyqtarynyń jyly aıasyndaǵy negizgi is-sharalardyń biri – kolledjderdi ınternatsıonaldandyrý. Basty maqsat – olardyń básekege qabilettiligin arttyrý, oqý baǵdarlamalaryn halyqaralyq standarttarǵa sáıkestendirý jáne zamanaýı eńbek naryǵynyń syn-qaterlerine jaýap bere alatyn mamandardy daıarlaýǵa jaǵdaı jasaý», – deıdi Tehnıkalyq jáne kásiptik bilim departamentiniń dırektory Áset Muhanbetov.

Osy bastama aıasynda 2025 jyly elimiz boıynsha 10 kolledj ınternatsıonaldandyrylady. Olardyń qatarynda – N.Bekbosynov atyndaǵy Mańǵystaý energetıkalyq kolledji, Astana qalasynyń qoǵamdyq tamaqtaný jáne servıs kolledji, Shymkent qalasynyń jeńil ónerkásip jáne servıs kolledji jáne basqalary bar.

Búginde osy uıymdardyń stýdentteri men pedagogteri Japonııa, Frantsııa, Qytaı, Túrkııa jáne basqa elderdiń kolledjderinde jáne seriktes kásiporyndarynda oqýdan jáne taǵylymdamadan ótýde.

Aıta keteıik, buǵan deıin jumysshy mamandyq ıelerine qaı salada kóp aılyq tóleıtinin jazdyq.