Qazaqstan júk tasymalyn JI arqyly basqarýdy josparlap otyr
ASTANA. KAZINFORM — Qazaqstanda jasandy ıntellekt kómegimen júk tasymaly kezinde týyndaýy múmkin keshigýlerdi aldyn ala anyqtaý jáne kólik ınfraqurylymyn tıimdi paıdalaný kózdelip otyr. Bul týraly New Silk Way halyqaralyq forýmynda Kólik vıtse-mınıstri Jánibek Taıjanov aıtty.
Onyń sózinshe, kólik salasyn tsıfrlandyrýdaǵy negizgi mindetterdiń biri — ártúrli aqparattyq júıelerdi ózara baılanystyryp, júk tasymaly týraly málimetterdi bir jerge jınaqtaý.
— Qazir osy baǵytta Smart Data Transport salalyq derekter platformasy damytylyp jatyr. Oǵan kólik salasyndaǵy birqatar aqparattyq júıe qosylǵan. Jańa derekkózderdi biriktirý jumysy jalǵasýda, — dedi spıker.
Vıtse-mınıstrdiń aıtýynsha, bolashaqta júk tasymalyna qatysty málimetti bir ret engizip, ony tasymaldyń barlyq kezeńinde paıdalaný múmkindigi jasalýy tıis. Bul qujat rásimdeýge ketetin ýaqytty qysqartyp, logıstıkalyq úderisterdi jeńildetýge múmkindik beredi.
Sonymen qatar jınalǵan derekterdi taldaý úshin jasandy ıntellekt tehnologııalaryn paıdalaný mańyzdy.
— Jasandy ıntellekt júk tasymalynyń qaı jerde keshigýi múmkin ekenin aldyn ala anyqtaýǵa, ınfraqurylymdy tıimdi paıdalanýǵa jáne yqtımal qaýipterdiń aldyn alýǵa kómektesedi, — dedi Jánibek Taıjanov.
Onyń aıtýynsha, halyqaralyq júk tasymalyn jedeldetý úshin jańa joldar men kólik nysandaryn salý ǵana jetkiliksiz. Qoldanystaǵy ınfraqurylymdy tıimdi paıdalaný, aqparat almasýdy jedeldetý jáne tasymaldyń ár kezeńindegi kidiristerdi azaıtý da mańyzdy.
Osyǵan baılanysty Qazaqstan kólik salasyndaǵy tsıfrlyq júıelerdi biriktirý jáne jasandy ıntellekt tehnologııalaryn qoldaný baǵytyndaǵy jumysty jalǵastyryp jatyr.
Buǵan deıin Qazaqstan Qytaıdan Eýropaǵa deıingi júk tasymalyn tsıfrlandyrýdy usynǵan edi.
