Qazaqstan JOO-larynyń rektorlary pikirtalas arqyly tańdalady
ASTANA. QazAqparat - Qazaqstanda joǵary oqý oryndarynyń rektory laýazymyna áleýetti úmitkerler arasynda pikirtalastar uıymdastyrylady.
Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi brıfıngte QR BǴM Joǵary jáne joǵary oqý ornynan keıingi bilim departamentiniń dırektory Darhan Ahmet-Zakı málim etti.
«Kandıdattar qalaı bolǵanda da óziniń damý baǵdarlamasyn tyńǵylyqty daıyndaýda barynsha shyǵarmashylyqqa beıim bolýy tıis. Tipti biz áleýetti úmitkerler arasynda pikirtalastar uıymdastyrý nusqasyn da boljap otyrmyz. Onda úsheýi aqtyq synǵa qalady», - dedi ol tilshilerdiń saýalyna oraı.
Onyń túsindirýinshe, qazirgi ýaqytta sáıkesinshe normatıvtik-quqyqtyq akti QR UEM-niń 70-shi buıryǵy qabyldandy. Ol respýblıkalyq memlekettik kásiporyndarda (joǵary oqý oryndarynda) rektorlardyń saılanbalylyǵyn reglamentteıdi.
«Atalǵan qujatqa sáıkes, bizde respýblıkalyq komıssııa qurylyp, onyń jumysy kelesi túrde túziledi. Bos laýazymǵa konkýrs BAQ-ta, sonymen qatar QR BǴM saıtynda ornalastyrylady. Munan ary, úmitkerler óz qujattaryn QR BǴM-ǵa tapsyrady. Biz barlyq úmitkerlerge ózderiniń damý baǵdarlamalaryn jergilikti BAQ-ta jarııalaýǵa, sonymen birge olardy aqparattyq stendterge ornalastyrýǵa keńes beremiz», - dedi D.Ahmet-Zakı.
Kelesi kezeńde QR BǴM barlyq qujattardy baıqaýshylar keńesine tabys etedi. Damý baǵdarlamasyn qaraǵan keńes jasyryn daýys berý joly arqyly barynsha laıyqty úsh áleýetti úmitkerdi tańdaý týraly sheshim qabyldaıdy.
Al úmitkerlerdiń qaısysy basym ekendigin QR Premer-Mınıstri basshylyq jasaıtyn respýblıkalyq komıssııa sheshetin bolady.
