Qazaqstan JOO-laryna ınjenerlik bilim berýdiń jańa modeli engiziledi
ASTANA. KAZINFORM – 2024 jyldyń 1 qyrkúıeginde Satbayev ýnıversıtetinde jáne Shyǵys Qazaqstan tehnıkalyq ýnıversıetinde ınjenerlik bilim berýdiń jańa modeli engizildi.
Bıyl naqty óndiris pen akademııalyq daıyndyq arasyndaǵy alshaqtyqty azaıtýǵa baǵyttalǵan bul model elimizdiń barlyq joǵary oqý oryndaryna engiziledi.
QR Ǵylym jáne joǵary bilim mınıstrligi Joǵary jáne joǵary oqý ornynan keıingi bilim komıteti tóraǵasynyń orynbasary Gúljan Jarasovanyń aıtýynsha, búginde Qazaqstannyń 54 JOO-synda ınjenerler oqytylady, onda 103 myńnan astam stýdent oqıdy.
− Injenerlik baǵyttyń aıasy keń jáne Qorshaǵan orta, Fızıkalyq jáne hımııalyq ǵylymdar, Geologııa, Aqparattyq-kommýnıkatsııalyq tehnologııalar, Kólik qyzmeti jáne basqa salalardy qamtıdy. Qazaqstanda ınjenerlik bilim birqatar syn-tegeýringe tap bolýda. Alaıda máselelerdi sheshý úshin birshama bastama qolǵa alyndy. Atap aıtqanda, bilim berý baǵdarlamalaryn ózektendirý, bilim berýdi ınternatsıonaldandyrý, tsıfrlyq ınfraqurylymdy damytý, erte kásiptik baǵdarlaý, akademııalyq jáne zertteý basymdyq ortalyqtaryn qurý jáne «ındýstrııalyq PhD» tetigin engizý, − dedi G. Jarasova Ortalyq kommýnıkatsııalar qyzmetinde ótken brıfıngte.
«Indýstrııalyq RhD» boıynsha 94 doktorant qabyldandy. Doktoranttar kásiporyndardyń naqty mindetterin sheshýge baǵyttalǵan zertteýler júrgizedi jáne kásiporyndar úshin ratsıonalızatorlyq usynystar ázirleıdi.
Jańa model mektepterde ınjenerlik synyptardyń ashylýynan bastap erte kásiptik baǵdarlaýdy, tehnıkalyq JOO-lardyń óndirispen tolyq ıntegratsııasyn kózdeıdi. Osylaısha Edunavigator.kz platformasynda 100 846 oqýshy kásibı dıagnostıkadan ótip, 12 myńnan astamy ınjenerlik baǵytty bolashaq mamandyǵy retinde tańdaýǵa nıetti ekenin kórsetken.
Sondaı-aq, ınjenerlerdi daıarlaýdyń jańa modeli bilim berý baǵdarlamalaryn ázirleýden bastap óndiristik praktıkadan ótýge jáne jumysqa ornalasýǵa deıingi jumys berýshilermen tyǵyz baılanysqa negizdelgen. Ótken jyly baǵdarlamalardyń 71%-y zamanaýı eńbek naryǵynyń talaptaryn eskere otyryp jańartyldy.
Óz kezeginde Satbayev University jańa model aıasynda halyqaralyq seriktestikterdi belsendi damytyp, AQSh, Ulybrıtanııa, Germanııa, Koreıa jáne basqa elderdiń jetekshi ýnıversıtetterimen qos dıplomdy baǵdarlamalardy usynady.
Sondaı-aq, ýnıversıtet KAZ Minerals, Samuryq-Energo jáne Alageum Electric sııaqty óndiristik seriktestermen yntymaqtasyp, stýdentterge naqty kásiporyndarda taǵylymdamadan ótý jáne praktıka múmkindikterin usynýda.
Al Shyǵys Qazaqstan tehnıkalyq ýnıversıetinde jobalyq menedjment jáne jelilik ınjenerlik mektep, ınjenerlik bilim berý kóshbasshylary, Fab Lab jáne akademııalyq jáne zertteý basymdyq ortalyqtary sııaqty jobalar qolǵa alynǵan. «Kólik jasaýdaǵy smart-tehnologııalar jáne jasandy ıntellekt» sııaqty jańa baǵdarlamalar engizilip, ınjenerlik kadrlardy sertıfıkattaý ortalyǵy qurylǵan.
Sondaı-aq, qytaılyq seriktester demeýshiligimen ashylǵan Lý Ban sheberhanasy zamanaýı jabdyqtarymen qamtylǵan, onda 8 elden 400 stýdent bilim alýda.
Eske sala ketsek, Memleket basshysy Qasym-Jomart Toqaev 2024 jylǵy 12 sáýirdegi Ǵylym jáne tehnologııalar jónindegi ulttyq keńestiń otyrysynda ınjenerlik kadrlardy daıarlaýdyń ulttyq modelin ázirleýdi tapsyrǵan edi.