Qazaqstan JOO-lary QS Subject Rankings reıtınginde rekordtyq nátıje kórsetti
ASTANA. KAZINFORM – QS Quacquarelli Symonds halyqaralyq taldamalyq agenttigi QS World University Rankings by Subject 2026 pándik reıtıngin jarııalady. Bıyl Qazaqstannyń joǵary oqý oryndary óz pozıtsııalaryn nyǵaıtyp, Ortalyq Azııa boıynsha tarıhı rekord ornatty.
QS pándik reıtıngi 100-den astam el men aýmaqtaǵy 1900 ýnıversıtet usynatyn 21 myńnan astam bilim berý baǵdarlamasyn salystyrmaly túrde baǵalaý nátıjesinde jasalǵan. Reıtıng 55 pándi jáne 5 iri baǵytty qamtıdy: óner jáne gýmanıtarlyq ǵylymdar, ınjenerııa jáne tehnologııalar, ómir týraly ǵylymdar jáne medıtsına, jaratylystaný ǵylymdary, áleýmettik ǵylymdar jáne menedjment.
2026 jylǵy nátıjeler boıynsha Abaı atyndaǵy Qazaq ulttyq pedagogıkalyq ýnıversıteti «Bilim berý jáne oqytý» baǵyty boıynsha álemde 41-oryn alyp, top-50 qataryna endi. Bul – Ortalyq Azııa elderi úshin eń joǵary nátıje.
Qurmanǵazy atyndaǵy Qazaq ulttyq konservatorııasy alǵash ret «Oryndaýshylyq óner» baǵyty boıynsha álemniń úzdik 100 ýnıversıtetiniń qataryna kirdi.
Ál-Farabı atyndaǵy Qazaq ulttyq ýnıversıteti tórt salalyq jáne 23 pándik reıtıngte usynylyp, kórsetkish sany boıynsha eldegi kóshbasshy atandy. Odan keıin bir salalyq jáne 15 pándik reıtıngke engen L.N. Gýmılev atyndaǵy Eýrazııa ulttyq ýnıversıteti ornalasty. Qazaq ulttyq agrarlyq zertteý ýnıversıteti, Qurmanǵazy atyndaǵy Qazaq ulttyq konservatorııasy jáne Abaı atyndaǵy Qazaq ulttyq pedagogıkalyq ýnıversıteti ózderiniń beıindi baǵyttary boıynsha joǵary nátıjeler kórsetti.
Satbayev University 2026 jylǵy pándik reıtıngterde jańa pozıtsııalar sany boıynsha elde ekinshi oryn aldy.
Bıyl qazaqstandyq ýnıversıtetter «Bilim berý jáne oqytý» men «Lıngvıstıka» baǵyttary boıynsha kórsetkishterin jaqsartty. Sonymen qatar «Býhgalterlik esep jáne qarjy», «Bıologııalyq ǵylymdar», «Qorshaǵan orta týraly ǵylymdar» jáne «Materıaltaný» pánderi boıynsha alǵash ret reıtıngke endi.
QS uıymynyń aǵa vıtse-prezıdenti Ben Saýterdiń aıtýynsha, jańa nátıjeler Qazaqstannyń joǵary bilim berý júıesiniń básekege qabilettiligi artyp kele jatqanyn kórsetedi.
– Jańa pánder boıynsha 14 bilim berý baǵdarlamasynyń alǵash ret reıtıngke enýi halyqaralyq moıyndaýdyń kúsheıgenin dáleldeıdi. Qazaqstan «Bilim berý jáne oqytý» jáne «Lıngvıstıka» baǵyttary boıynsha kórsetkishterin jaqsartyp, «Oryndaýshylyq óner» baǵyty boıynsha alǵash ret top-100 qataryna endi, – dedi ol.
QS uıymynyń óńirlik dırektory Sergeı Hrıstolıýbov Qazaqstan Ortalyq Azııada pándik reıtıngterdiń top-100 qataryna engen jalǵyz el ekenin atap ótti.
– «Bilim berý jáne oqytý» baǵyty boıynsha top-50 qataryna ený – tek Abaı atyndaǵy Qazaq ulttyq pedagogıkalyq ýnıversıteti úshin ǵana emes, búkil ulttyq joǵary bilim berý júıesi úshin mańyzdy jetistik. Qazaqstannyń pándik reıtıngterdegi qatysýy 13 ýnıversıtetke deıin ósip, olar 4 baǵyt pen 27 pán boıynsha 70 pozıtsııaǵa ıe boldy. Bul – rekordtyq kórsetkish, – dedi ol.
Sarapshylardyń pikirinshe, bul nátıjeler Qazaqstannyń joǵary bilim berý júıesiniń turaqty damyp kele jatqanyn jáne onyń jahandyq akademııalyq keńistikke yqpaldasýy kúsheıgenin kórsetedi.
Aıta keteıik, Qazaqstan stýdentteri 30-dan astam ınnovatsııalyq IT-joba usyndy.
