Qazaqstan JOO-lardy akkredıtteý talaptaryn jańartpaq
ASTANA. KAZINFORM – Bul týraly elordada ótip jatqan Bilim berý sapasyn qamtamasyz etý jónindegi X Ortalyq Azııa halyqaralyq forýmynda Ǵylym jáne joǵary bilim vıtse-mınıstri Talǵat Eshenqulov aıtty.
Spıkerdiń aıtýynsha, Eýropalyq joǵary bilim keńistiginde bilim sapasyn qamtamasyz etýge arnalǵan ESG standarttary qaıta qaralyp jatyr. Jańartylǵan qujat jobasynda jasandy ıntellekt pen tsıfrlyq tehnologııalardy qoldanýǵa da nazar aýdarylǵan.
– Qazaqstan ulttyq akkredıtteý tásilderin ESG-diń jańa redaktsııasyna sáıkestendirýi kerek. Ol úshin akkredıtteý agenttikteriniń standarttaryn, JOO-lardyń ishki sapany qamtamasyz etý júıesine qoıylatyn talaptardy jáne syrtqy baǵalaý rásimderin jańartý qajet. Bul jumys agenttiktermen, JOO-larmen, stýdenttermen jáne jumys berýshilermen dıalog negizinde júrgiziledi dep josparlap otyrmyz, – dedi Talǵat Eshenqulov.
Sonymen qosa, vıtse-mınıstr ýnıversıtetterdi tsıfrlandyrý, jasandy ıntellektini qoldaný jáne bilim sapasyn qamtamasyz etýdiń jańa tásilderi Eýropalyq joǵary bilim keńistiginde turaqty talqylanyp kele jatqanyn atap ótti.
Aıta keteıik, buǵan deıin Qazaqstandyq JOO-larda ChatGPT Edu engiziletini habarlandy.
