Qazaqstan joldarynda Japonııanyń qardan qorǵaıtyn qorshaýlary salynýy múmkin

ASTANA. QazAqparat - «QazAvtoJol» UK» AQ ókilderi Tokıo qalasyna jasaǵan jumys saparynyń aıasynda Japonııanyń avtomobıl joldaryndaǵy zamanaýı qardan qorǵaıtyn qorshaýlardyń daıyndalýy jáne qoldanylýymen tanysyp ótti, dep habarlaıdy «QazAqparat» HAA qoǵamnyń resmı saıtyna silteme jasap.

Jumys saparynyń barysynda qoǵam ókilderi trosty qorshaýlardy daıyndaýmen aınalysatyn «Tsýchıýra Tokyo Rope» zaýytyna baryp, sondaı-aq Tokıo jáne Djoban avtobandarymen tanysty. Qazaqstandyq qonaqtarǵa japondyq kompanııanyń tehnologııasy men ónimderi qoldanylyp salynǵan, qardyń jol ústine jınalmaı, asyp ketýine múmkindik beretin qorshaýlardyń konstrýktsııalyq ereksheligi tanystyryldy.
 

Temirarqandy qorshaýlar Qazaqstanda qoldanylýy úshin olardyń tehnıkalyq tártipke sáıkes kelýi mindetti shart bolyp tabylady. Arqandar qoldanylatyn qorshaýlar Ulttyq ǵylymı-zertteý ortalyǵynda jol qozǵalysy qaýipsizdiginiń zerthanasynda júrgizilgen synaqtar barysynda usynylǵan normatıvtermen retteledi. Júrgizilgen jumystardyń nátıjesinde Qazaqstannyń aýa raıy jaǵdaıyna baılanysty qardan qorǵaıtyn qorshaýlardy jasap shyǵarý kelisilgen.
 

«QazAvtoJol» ókilderi Tokıoda «Tehno-jármeńke 2018» jol ónimderi kórmesine de bardy.

Jumys saparynyń sońynda «QazAvtoJol» TOKYO ROPE INTERNATIONAL INC kompanııasymen ózara yntymaqtastyq týraly memorandýmǵa qol qoıdy.