Qazaqstan joldarynda zań buzǵan júk kólikterine 34,5 mln teńge aıyppul salyndy
NUR-SULTAN. QazAqparat - Kólik komıteti 21 mamyrdan bastap 31 tamyzǵa deıin «Nazar aýdaryńyz, aýyr salmaqty kólik» tekserý naýqanyn ótkizip jatyr, dep habarlaıdy QazAqparat QR Indýstrııa jáne ınfraqurylymdyq damý mınıstrliginiń baspasóz qyzmetine silteme jasap.
Aktsııa aıasynda 21 mamyr men 10 maýsym aralyǵynda 10 174 avtokólik quraly tekserilip, 202 zań buzý faktisi anyqtaldy. Onyń ishinde 190 quqyq buzýshylyq - qazaqstandyqtarǵa jáne 12 fakti - sheteldik tasymaldaýshylarǵa qatysty. Olarǵa 34,5 mln teńgeden astam aıyppul salynyp, júrip ótkeni úshin alym somasy 14 mln teńgeni qurady.
Aktsııa maqsaty - iri gabarıtti jáne aýyr salmaqty júkti tasymaldaý erejelerin buzýdyń aldyn alý jáne eskertý, sondaı-aq aýyr salmaqty kólikterdiń jolǵa zalal keltirýine jol bermeý. Aktsııa barysynda respýblıka joldarynda kólik quraldaryna baqylaý kúsheıtiledi.
Aıta keteıik, aktsııa bastalǵaly beri ahýal ortalyǵynyń +7 708 088 00 80 nómirli Whats App messendjerine 1 025 ótinish kelip tústi.
