Qazaqstan joldarynda standartqa sáıkessizdiktiń 5 myń faktisi anyqtaldy

NUR-SULTAN. QazAqparat - QR Indýstrııa jáne ınfraqurylymdyq damý mınıstrligi Avtomobıl joldary komıtetiniń «Ulttyq jol aktıvteri sapasy ortalyǵy» RMK 2019 jyly atqarǵan jumysynyń alǵashqy qorytyndylaryn jarııalady, dep habarlaıdy QazAqparat.

Málim etilgendeı, ortalyq mamandary ótken jyly Qazaqstan joldarynda 13 myńǵa tarta tekseris júrgizip, 5 myńnan astam ár alýan olqylyqty anyqtaǵan.

Máselen, Aqmola oblysyna qarasty Qosshy kentinde uıymdastyrylǵan reıdke qoǵam belsendileri, respýblıkalyq arnaıy monıtorıngtik top pen buqaralyq aqparat quraldarynyń ókilderi tartylǵan. Tekseris barysynda túrli kemshilikter anyqtalyp, tehnıkalyq qadaǵalaý, sýbmerdigerlik jáne jobalyq uıymdardyń mamandaryna ákimshilik aıyppul salyndy.

«Sondaı-aq, 2019 jyly ortalyq Shyǵys Qazaqstan, Pavlodar jáne Qyzylorda oblystaryndaǵy joldardyń talapqa sáıkestigi tekserildi. Atalmysh jumystardyń nátıjesinde jergilikti mańyzdaǵy «Maıqaıyń-Ekibastuz» jáne «Jalaǵash-Josaly» joldary standarttarǵa saı emestigi anyqtaldy», - delingen habarlamada.

Eske salaıyq, «Ulttyq jol aktıvteri sapasy ortalyǵy» QR Úkimeti Qaýlysynyń negizinde 2019 jyly 16 «Obljolzerthana» RMM biriktirilýi arqyly qurylǵan bolatyn. Ortalyqty qurýdaǵy maqsat – respýblıkalyq mańyzy bar joldardyń ǵana emes, jergilikti jol jelisiniń sapasyn tekserý, jol aktıvterin basqarý, jol qaýipsizdigi deńgeıin monıtorıngten ótkizý, jańa tehnılogııalar men materıaldardy engizý. Bıyl atalmysh kásiporyn Qazaqstan joldarynyń sapasyn baqylaý sharalaryn kúsheıte túspek.