Qazaqstan joldarynda qaza bolǵan adam sany aýǵan soǵysyndaǵy adam shyǵynan eki esege deıin asyp ketipti

Búgin Parlament Májilisiniń  jalpy otyrysynda   Úkimet basshysynyń atyna saýal joldap, elimizdiń joldaryndaǵy problemalardy kótergen depýtat Azat Perýashev osylaı málim etti.

Depýtattyń málimetine qaraǵanda, sońǵy 10 jyl ishinde elimizde jol-kólik oqıǵalarynan balalardy qosa alǵanda 32 myńnan astam adam kóz jumǵan. 166 myńnan astamy jaraqattar alyp, mertikken.  «Jol-kólik oqıǵalarynan qaza tapqan qazaqstandyqtardyń sany aýǵan soǵysyndaǵy Keńes áskeriniń shyǵynynan eki eseden astam kóp. Máselen, salystyrmaly túrde alsaq: álgi soǵysta osyndaı 10 jyl ishinde  14 myńdaı adam kóz jumǵan eken.  Sonda Qazaqstan joldarynda kóptegen adamdardyń ólimine alyp kelip jatqan kúndelikti toqtaýsyz soǵys júrip jatyr dep te aıtýǵa bolady», - deıdi depýtat.

Onyń sózine qaraǵanda, jol-kólik oqıǵalarynan qaza tapqandardyń edáýir úlesi respýblıkalyq jáne halyqaralyq mańyzy bar joldarǵa keledi eken. Máselen, 2011 jyly  jol-kólik oqıǵalarynan 2707 adamnyń 1113-i nemese 41  paıyzy osyndaı joldarda qaza tapqan. 

Sonymen qatar, depýtattyń paıymynsha, jol-kólik oqıǵalarynyń basty sebepteriniń ishinde qarsy baǵyttaǵy qozǵalys jolaǵyna shyǵyp ketý jaǵdaıy eleýli oryn alyp otyr (barlyq oqıǵalardyń 10 %-dan astamy). «Júrgizýshilerdiń aıtýynsha, adam ólimi kóp oryn alatyn «Almaty-Astana» trassasynyń negizgi bóligi boıynsha eki jolaqty bolyp tabylady. Ol jol tóseminiń tarlyǵymen jáne bólip turatyn tosqaýyldyń joqtyǵymen erekshelenedi. Al bul jaǵdaı kólik quraldarynyń joǵary tyǵyzdyǵy men ártúrli qozǵalys jyldamdyǵy kezinde kólikterdiń qarsy baǵyttaǵy qozǵalys jolaǵyna shyǵyp ketýine jáne aýyr apattarǵa ákelip soǵady.  Sonymen birge «Almaty-Astana» trassasy tek atalǵan qalalardy ǵana emes, sondaı-aq Qazaqstannyń soltústigi men ońtústigin, bizben kórshiles memleketterdi baılanystyratyn jalǵyz jol bolyp tabylady.  Jolaýshylar jáne júk tasý dúrmegi jyl saıyn ósýde. Osyǵan baılanysty, trassany 4 jolaqqa deıin keńeıtý jáne qarama-qarsy baǵyttaǵy qozǵalys jolaqtarynyń arasyna bólip turatyn tosqaýyl qoıý jolymen «Almaty-Astana» trassasyn jańǵyrtý týraly máseleni kóterýdi qajet dep oılaımyz», - deıdi Azat Perýashev.