Qazaqstan joldarynda ıntellektýaldy júrginshiler joly men 3D jol belgileri paıda bolady
NUR-SULTAN. QazAqparat – Qazaqstan joldarynda ıntellektýaldy jaıaý júrginshiler joly, ınteraktıvti jáne 3D formattaǵy jol belgileri pılottyq rejımde engiziledi. Bul týraly QR Іshki ister mınıstrligi aıtyp berdi, dep habarlaıdy QazAqparat.
«Іshki ister mınıstrliginde Indýstrııa jáne ınfraqurylymdyq damý mınıstrliginiń, «Qazavtojol» ulttyq kompanııasynyń, elimizdiń birqatar salalyq joǵary oqý oryndarynyń ókilderimen jol qaýipsizdigin qamtamasyz etý máseleleri boıynsha vedomstvoaralyq semınar-keńes ótti. Avtomobıl joldarynyń qaýipsizdigin arttyrý maqsatynda ІІM mamandary sheteldik ozyq tájirıbeni zerttep, Almaty, Jambyl jáne Shyǵys Qazaqstan oblystarynyń joldarynda pılottyq jobany iske qosýdy usyndy», - dedi QR ІІM resmı ókili Nurdildá Oraz onlaın brıfıngide.
Onyń aıtýynsha, ozyq tehnıkalyq sheshimder shynaıy ómirde testilenip, qazaqstandyq joldardyń erekshelikterine beıimdeledi. Olardyń ishinde – proektsııalyq jáne ıntellektýaldy jaıaý júrginshiler joly, balamaly jol belgileri, sonyń ishinde kólemdi 3D format, ınteraktıvti jol belgileri jáne t.b. bar.
«Іshki ister organdarynyń statıstıkasy boıynsha, jyl basynan beri 3 aıda respýblıkada 2 621 jol-kólik oqıǵasy boldy, onda 363 adam qaza taýyp, 3 605 adam jaraqat aldy. Ótken jyldyń sáıkes kezeńimen salystyrǵanda qaza bolǵandar sany 11,7%-ǵa ósken. Jol-kólik oqıǵalarynyń basty sebepteri – jyldamdyqty asyrý, qarsy jolaqqa shyǵý jáne jol qıylystarynan ótý kezindegi júrgizýshilerdiń ereje buzýy bolyp otyr», - dedi resmı ókil.
