Qazaqstan joldaryna jol belgileri men baǵdarshamdar jetispeıdi – ІІM

NUR-SULTAN. QazAqparat – QR Іshki ister mınıstrligi Ákimshilik polıtsııa komıteti tóraǵasynyń orynbasary Serik Túsipov jaıaý júrginshilerdiń qaýipsizdigi máselelerin aıtyp berdi, dep habarlaıdy QazAqparat.

Onyń aıtýynsha, eldegi árbir úshinshi jol-kólik oqıǵasy (2 621 apattyń 961-i nemese 37%), árbir úshinshi qaza tapqan (30%) jáne jaralanǵandar (25%) jaıaý júrginshiler úlesine tıesili.

«Bul rette jaıaý júrginshilerdiń de júris-turysyna qatysty problemalar bar. 2020 jyly olardyń tarapynan 200 myńnan astam buzýshylyq anyqtaldy. Bıylǵy jyl basynan beri – 66,7 myń», - dedi Serik Túsipov mınıstrlikte ótken onlaın brıfıngide.

Álemdik tájirıbe kórsetkendeı, jaıaý júrginshilerdiń tıisti qaýipsizdigin damyǵan jaıaý júrginshiler ınfraqurylymy ǵana qamtamasyz ete alady.

Bıyl jol ınspektsııasy bólimsheleri shamamen 168 myń shaqyrymdy qamtıtyn 8 myńǵa jýyq avtojolǵa tekserý júrgizgen. Onyń ishinde eldimekenderdiń kóshe-jol jelisine 4 877 tekserý júrgizilip, jol qaýipsizdigine teris áser etetin avtojoldardy kútip-ustaýdaǵy 8 445 kemshilik anyqtalǵan.

«Bizdiń qyzmetkerler bul kemshilikterdi joıý boıynsha 7 886 uıǵarym berdi, joldardy kútip ustaýǵa jaýapty myńǵa jýyq (976) laýazymdy tulǵaǵa aıyppul salyndy», - dedi Serik Túsipov.

Onyń aıtýynsha, elimizdegi joldarǵa qosymsha 23 myńnan astam jol belgilerin, 1 141 dana baǵdarsham, 767 qosymsha retteletin jaıaý júrginshiler joly men 8 myń shaqyrym kóshe-jol jelisine jaryq ornatý qajet.