Qazaqstan joldaryna IRAP júıesimen baǵalaý júrgiziledi

NUR-SULTAN. QazAqparat – Búgin Jol aktıvteriniń ulttyq sapa ortalyǵy men Halyqaralyq avtomobıl joldaryn baǵalaý IRAP júıesi seriktestik týraly memorandýmǵa qol qoıdy, dep habarlaıdy QazAqparat tilshisi.

«QR Ulttyq statıstıka bıýrosynyń derekterine sáıkes jol-kólik oqıǵasy kezinde jyl saıyn orta eseppen 2 000-nan astam adam qaıtys bolady. Sondyqtan Jol aktıvteriniń ulttyq sapa ortalyǵy jol-kólik oqıǵasy kezinde adam ólimin tómendetý maqsatynda ótken jyldan bastap halyqaralyq uıymdarmen birlesip, IRAP joldardyń qaýipsizdigin baǵalaýdyń júıesin engizý júrgizilýde»,- delingen atalǵan ortalyqtaratqan aqparatta.

Baǵdarlamanyń maqsaty - jol qaýipsizdigin arttyrý arqyly ólim-jitimdi azaıtý. Qaýipsizdik deńgeıin baǵalaý kezinde jol apatyna sebep bolatyn 50-den astam túrli faktorge erekshe kóńil bólinedi. Halyqaralyq konsýltanttarmen birlesip, IRAP ádisi boıynsha túsirilim jumystary 5 000 shaqyrym respýblıkalyq avtomobıl joldaryna júrgizildi jáne 1 000 qalalyq avtomobıl joldaryna túsirilim jumystary aıaqtalýǵa jaqyn.

«Jol kólik oqıǵasy saldaryna aldymen adamı faktor sebep bolsa, ekinshisi árıne joldardyń sapasyzdyǵy, jol belgileriniń talapqa saı bolmaýy, tehnıkanyń aqaýlyǵy sııaqty jaǵdaılar sebep bolýda. IRAP halyqaralyq baǵalaý júıesi mine osy olqylyqtyń orynyn toltyrmaq», - deıdi Jol aktıvteriniń ulttyq sapa ortalyǵynyń bas dırektory Zamır Saǵynov.

2020 jyldyń qorytyndysynda Jol aktıvteriniń ulttyq sapa ortalyǵynyń 17 qyzmetkeri zamanaýı tehnıkany ıgerý úshin oqytyldy.