Qazaqstan joldaryna eski shınalardan jasalǵan qospa qoldanylady
ALMATY. QazAqparat - Qazaqstanda jol sapasyn jaqsartýǵa arnalǵan jańa tehnologııa synaqtan ótti. «QazjolǴZI» AQ rezeńke-asfaltbetondy qospany tájirıbe retinde jolǵa tóseý isin júzege asyrdy, dep habarlaıdy QazAqparat tilshisi.
«Qazaqstan jol ǵylymı-zertteý ınstıtýty» jol qurylysynda rezeńke úgindisin qosymsha kompozıtsııalyq shıkizat retinde qoldanýdyń paıdasyn anyqtaǵan.
«QazjolǴZI» mamandary rezeńke úgindilerin jol qurylysyna shıkizat retinde paıdalanýdy ǵylymı turǵydan zerttep, zerdeledi. Nátıjesinde, rezeńke -asfalt qospasynyń normatıvtik qujaty jasaldy. Sonyń negizinde jol qurylysyna tozǵan shınalardyń úgindilerin paıdalanýǵa kepildik berip otyr. Shuryq-tesik joldardy jamaı berýge qyrýar qarajat shyǵarmaı osy materıaldardy paıdaǵa asyrý asa tıimdi», - deıdi «QazjolǴZI» AQ jol qurylymdary jáne materıaldary departamentiniń dırektory Ǵalııa Izmaılova.
Ǵylymı ınstıtýt mamandarynyń aıtýynsha, rezeńke-asfaltbetondy jabyndy jolda jaryq-syzattardy boldyrmaıdy, sý ótkizbeıdi, tyǵyz jáne avtokólik dóńgelekterine de jaıly.
«Qolǵa alǵan jabanyń maqsaty - syn kótermeıtin joldardyń sapasyn arttyrý. Rezeńke-asfaltbetondy qospa túrli temperatýralarda tózimdi. Joldyń ústingi qabatynyń buzylýyna, jaryqshaqtardyń paıda bolýyna qarsy turady. Sonymen qatar tozǵan dóńgelekterdi kádege jaratýǵa jol ashyp, qorshaǵan ortadaǵy ekologııalyq problemalardy sheshýge múmkindik beredi», - deıdi departament dırektory.
Atalmysh jańa tehnologııany synaqtan ótkizý úshin rezeńke qosylǵan asfalt 2017-2018 jyldary Nur-Sultan jáne Kókshetaý qalalarynyń avtojoldaryna tóselgen bolatyn. Uzyndyǵy 500 metrdi qamtıtyn ýchaske ádettegi joldardan qaraǵanda berik bolatyndyǵyn kórsetken. Tozyǵy jetken kólik dóńgelekteri jol qurylysyna taptyrmaıtyn shıkizat ekendigin halyqaralyq tájirbı jáne búgingi zertteý qorytyndysy kórsetip otyr.
Avtory Alma Muqanova
