Qazaqstanda jarty jylda jol apatynan 807 adam qaza tapty
ASTANA. KAZINFORM — 2026 jyldyń alǵashqy jartyjyldyǵynda Qazaqstan joldaryndaǵy jol-kólik oqıǵalarynan qaza tapqandar sany 15,5% azaıdy. Bul týraly Bas prokýratýra habarlady.
Resmı málimetke qaraǵanda, alty aıda jol-kólik oqıǵalarynan zardap shekkender sany 22 346-dan 21 007 adamǵa deıin tómendegen. Al qaza bolǵandar sany 955-ten 807 adamǵa deıin azaıdy.
Prokýratýranyń málimetinshe, bul nátıjege jol qaýipsizdigin kúsheıtýge baǵyttalǵan birqatar sharalardyń arqasynda qol jetkizilgen.
— Atap aıtqanda, ortasha jyldamdyqty baqylaý júıesi engizilip, júrgizýshilerdi daıarlaıtyn oqý uıymdaryn lıtsenzııalaý qaıta jandandy, mopedterdi mindetti tirkeý qolǵa alyndy jáne quqyq buzýshylyqtardy avtomatty túrde tirkeý júıesi keńeıtildi, — delingen habarlamada.
Alty aı ishinde 15 188 jol-kólik oqıǵasy tirkelgen. Onyń basym bóligi jol erejesin qasaqana jáne júıeli túrde buzatyn júrgizýshilerdiń qatysýymen bolǵan.
— Jaıaý júrginshiler ótkelderinde 5 971 adam jaraqat alyp, 208 azamat, onyń ishinde 40 bala kóz jumǵan. Mas kúıinde kólik basqarǵan júrgizýshilerdiń kinásinen 209 adam zardap shegip, 8 adam qaıtys bolǵan. Eń kóp adam ólimi jyldamdyqty shamadan tys arttyrý men qaýipti manevrlerdiń saldarynan tirkelgen. Osy eki sebep boıynsha 8 myńnan astam adam jaraqat alyp, 676 adam qaza tapqan, — dep habarlady vedomstvo.
Prokýratýra jol buzaqylyǵyna qatysty jaýapkershilikti kúsheıtý sharalary júrgizilip jatqanyn atap ótti. Bıyl Ákimshilik quqyq buzýshylyq týraly kodekstiń 434-baby boıynsha 29 júrgizýshi ákimshilik qamaýǵa alynǵan.
Sondaı-aq 25 tamyzdan bastap 65 jastan asqan jáne múgedektigi bar júrgizýshilerdiń medıtsınalyq tekserýden ótýin baqylaý tetigi jetildiriledi. Eger júrgizýshiniń medıtsınalyq tekserýden ótkeni týraly málimet memlekettik júıede bolmasa, onyń júrgizýshi kýáliginiń qoldanysy ýaqytsha toqtatylady.
Bas prokýratýra «Tsıfrlyq qadaǵalaý» platformasy arqyly jol erejesin jıi buzatyn júrgizýshilerdi anyqtaýǵa múmkindik beretin pılottyq jobany iske asyryp jatyr. Joba júrgizýshilerdiń tártibin baldyq júıe arqyly baǵalaýǵa baǵyttalǵan.
Vedomstvo azamattardy qaýipti kólik júrgizý, zańsyz jarystar jáne jol erejesin óreskel buzý faktileri týraly polıtsııaǵa habarlaýǵa úndedi. Prokýratýranyń málimetinshe, aýyr apattardyń kóbin buǵan deıin birneshe ret ákimshilik jaýapkershilikke tartylǵan júrgizýshiler jasaıdy.
Mysaly, Almatyda úsh adamnyń ómirin qıǵan jol apatyna sebepker bolǵan júrgizýshi buǵan deıin jyldamdyqty 21 ret asyrǵan. Al Aqmola oblysynda adam ólimine ákelgen apatty jasaǵan júrgizýshi jol erejesin 13 ret buzǵan.
Bas prokýratýra júrgizýshilerdi jyldamdyqty asyrmaýǵa, qaýipti manevr jasamaýǵa, mas kúıinde kólik basqarmaýǵa jáne jol qozǵalysy kezinde telefon qoldanbaýǵa úndedi. Vedomstvonyń aıtýynsha, jol qaýipsizdigi árbir júrgizýshi men jaıaý júrginshiniń jeke jaýapkershiligine baılanysty.
Eske salaıyq, buǵan deıin Aqtóbede jol-kólik apaty kezinde eki adam qaza taýyp, beseýi aýrýhanaǵa túskenin habarlaǵanbyz.
