Jyl saıyn 2 myń adam qaza tabady: jol erejesin qadaǵalaýǵa drondar tartylady

ASTANA. KAZINFORM – Jyl saıyn elimizdiń joldarynda  2 myńnan astam adam jol apatynan qaza taýyp, 20 myńnan astamy jaraqat alady. Bul týraly QR Іshki ister mınıstriniń orynbasary Igor Lepeha Úkimet otyrysynda aıtty.

Vıtse-mınıstrdiń aıtýynsha, joldaǵy apatqa birneshe faktor áser etedi. Eń basty sebep – joldaǵy tártiptiń tómendigi.

– Jol-kólik oqıǵalarynyń 90%-y júrgizýshilerdiń kinásinen bolady. Polıtsııa jyl saıyn 13 mıllıon jol erejesin buzý faktisiniń aldyn alady, – dep atap ótti ol.

Jyl basynan beri qaıǵyly saldarǵa ákelýi múmkin jol erejesin buzý derekteri 20%-ǵa, qarsy qozǵalys jolaǵyna shyǵý faktileri 16%-ǵa artqan. Sondaı-aq mas kúıinde kólik júrgizgen 16,6 myń júrgizýshi ustalǵan.

Jol qaýipsizdigin arttyrý úshin Іshki ister mınıstrligi patrýldeý baǵyttaryn kúsheıtip, jedel-aldyn alý sharalaryn jáne tekserý jumystaryn júrgizip jatyr. Búginnen bastap «Qaýipsiz jol» jedel-aldyn alý is-sharasy bastaldy.

Sonymen birge, drondar arqyly jol qozǵalysy qadaǵalana bastady. Drondar 3,6 myń jol erejesin buzý deregin tirkegen, onyń ishinde 1 myń jaǵdaı — qarsy jolaqqa shyǵý, 300-i — qaýipti basyp ozý faktileri.

Avtomattandyrylǵan kameralar jelisi de keńeıip keledi. Qazir olardyń sany 25 myńǵa jetken. Patrýldik avtokólikterge radarlar ornatylyp, jasyryn patrýldeý ádisi qoldanylyp jatyr.

Respýblıkalyq trassalarda ortasha jyldamdyqty baqylaý júıesi engizildi: jalpy uzyndyǵy 1900 shaqyrym bolatyn 8 jol qamtylǵan. Mınıstrlik dereginshe, osy trassalarda qaza bolǵandar sany 11% azaıǵan.

Jol erejesin qasaqana buzýshylarmen kúres maqsatynda barlyq tsıfrlyq sheshim men baqylaý kameralary «TOR» platformasyna biriktirildi. Bul júıe kólikterdiń qozǵalysyn baqylaýǵa, markasy, modeli jáne túsi boıynsha izdeýde júrgen avtokólikterdi anyqtaýǵa, agressıvti júrgizý faktilerin tirkeýge jáne kólikti úzdiksiz 8 saǵat aıdaǵan júrgizýshilerdi qadaǵalaýǵa múmkindik beredi.

Aıta keteıik, sońǵy kúnderi elde úsh jol apatynan 25 adam qaza tapty. Іshki ister mınıstrligi jol qozǵalysyna qatysýshylarǵa úndeý jasady.