Qazaqstan joldarynda 1 400-den astam servıs nysany jumys isteıdi
ASTANA. KAZINFORM — Qazaqstanda jol boıyndaǵy servısti júıeli túrde jańǵyrtý jumystary jalǵasyp jatyr. Búginde halyqaralyq jáne respýblıkalyq mańyzy bar avtomobıl joldarynyń boıynda 1 429 jol boıyndaǵy servıs nysany jumys isteıdi. Bul týraly Kólik mınıstrligi málim etti.
Qazirgi tańda onyń 1 340-y nemese 94%-y Ulttyq standart talaptaryna sáıkes keledi, al 2026 jyly bul kórsetkishti 95%-ǵa jetkizý kózdelip otyr. Jumys tek qoldanystaǵy nysandardy belgilengen talaptarǵa sáıkestendirýmen shektelmeı, júrgizýshiler men jolaýshylar úshin jańa ınfraqurylym qurýdy da qamtıdy.
Bıyl qosymsha avtojanarmaı quıý stantsııalaryn, qoǵamdyq tamaqtaný oryndaryn jáne sanıtarııalyq-gıgıenalyq toraptardy salý jáne ornatý josparlanýda. Sanıtarııalyq ınfraqurylymnyń sapasy men qoljetimdiligine erekshe kóńil bólinip otyr.
— Qazirgi ýaqytta avtomobıl joldarynyń boıynda 170-ten astam modýldik sanıtarııalyq-gıgıenalyq torap ornatylǵan. Sonymen qatar demalys alańdary men aıaldama pavılondarynda júrgizýshiler men jolaýshylarǵa táýlik boıy qoljetimdi 900-den astam tegin sanıtarııalyq nysan jumys isteıdi. Sanıtarııalyq nysandardy kútip-ustaý jáne paıdalaný olardyń tıesililigine qaraı «QAJservıs» JShS, jeke kásipkerlik sýbektileriniń ıeleri jáne jalǵa alýshylar tarapynan júzege asyrylady. Bul rette nysandardyń tıisti sanıtarııalyq jáne tehnıkalyq jaǵdaıyn qamtamasyz etý boıynsha kúndelikti jumystar júrgiziledi, — delingen habarlamada.
Sonymen qatar Qazaqstanda elektr kóligin damytýǵa qajetti ınfraqurylym qalyptastyrylýda. Búginde halyqaralyq jáne respýblıkalyq mańyzy bar avtomobıl joldarynyń boıynda 67 elektr kóligin qýattandyrý stantsııasy (EZS) jumys isteıdi. Zarıadtaý ınfraqurylymy elimizdiń kóptegen óńirlerin qamtıdy. Qoldanystaǵy jelini keńeıtý jumystary merdiger uıymdarmen jáne jergilikti atqarýshy organdarmen birlesip jalǵaspaq.
Elektr kóliginiń tanymaldyǵy artyp kele jatqanyn eskersek, EZS jelisin damytý erekshe mańyzǵa ıe. Eldi mekender arasyndaǵy baǵyttarda zarıadtaý stantsııalarynyń bolýy elektromobılderdi iri qalalar ishinde ǵana emes, óńirler arasyndaǵy uzaq saparlarda da keńinen paıdalanýǵa múmkindik beredi. Jol boıyndaǵy servısti jańǵyrtýdyń mańyzdy baǵyttarynyń biri — jeke ınvestıtsııalardy tartý. Kólik mınıstrligi bıznes ókilderimen jáne jergilikti atqarýshy organdarmen birlesip, jol boıyndaǵy servıstiń jańa nysandaryn qurý jáne qoldanystaǵy nysandardy jańǵyrtý boıynsha jumystar júrgizip jatyr.
Aıta keteıik, Kólik mınıstrligi júrgizýshilerge úndeý jasady.
