Qazaqstan joldaryn kim buzyp jatyr? QazAvtoJol alańdatarlyq derek jarııalady
ASTANA. KAZINFORM — «QazAvtoJol» ulttyq kompanııasynyń baspasóz qyzmeti artyq júk máselesiniń aýqymyn jarııalady. Aıtýlarynsha, bir myńǵa jýyq kólik 200 tonnadan artyq júkpen júrgen.
2026 jyldyń segiz aıynda «QazAvtoJol» UK» AQ-nyń avtomattandyrylǵan ólsheý stantsııalary (AÓS) kólik quraldarynyń ruqsat etilgen salmaǵyna qatysty 870 myńǵa jýyq yqtımal zań buzýshylyqty tirkedi. Onyń ishinde salmaǵy 50 tonnadan asatyn kólikter boıynsha shamamen 139 myń, 100 tonnadan asatyn kólikter boıynsha 12 myńǵa jýyq, al 200 tonnadan asatyn kólikter boıynsha 1 myńǵa jýyq derek tirkelgen. Bul kórsetkishter elimizdiń avtomobıl joldarynda belgilengen salmaq normalaryn saqtaý máselesiniń qanshalyqty ózekti ekenin ańǵartady.
— Jol konstrýktsııasy belgili bir normatıvtik júktemege eseptelip salynady. Al kólik quraldarynyń ruqsat etilgen salmaqtan júıeli túrde asyp júrýi joldyń tozýyn jedeldetedi. Sonyń saldarynan oıyq izder, yǵysýlar men jol jamylǵysynyń deformatsııalary paıda bolyp, jóndeýaralyq merzim qysqarady. Másele ásirese jańadan salynǵan jáne qaıta jańartylǵan avtojoldarda ótkir tur. Memleket jol jelisin damytýǵa qomaqty qarajat jumsap keledi. Alaıda joldarmen ruqsat etilgen jalpy salmaq pen ostik júktemeden asatyn kólikter turaqty júretin bolsa, jańa ınfraqurylymdy uzaq merzimge saqtaý qıyn. Jańadan salynǵan joldar artyq júktiń saldarynan merziminen buryn buzylmaýǵa tıis, — deıdi mamandar.
Sonymen qatar jekelegen júrgizýshilerdiń avtomattandyrylǵan baqylaýdan jaltarý áreketteri de tirkelip jatyr.
— Aýyr júk kólikteri AÓS-ti jol jıegi nemese tehnıkalyq ótkelder arqyly aınalyp ótýge tyrysady. Keıbir ýchaskelerde mundaı áreketterdiń aldyn alý úshin ornatylǵan fızıkalyq kedergilerdiń bógde tulǵalar tarapynan óz betinshe alynyp tastalǵan jaǵdaılary anyqtaldy. 2026 jyldyń basynan beri AÓS nysandarynyń órtenýine qatysty úsh jaǵdaı tirkeldi. Oqıǵalardyń sebepteri men mán-jaıyn quzyrly organdar anyqtap jatyr, — deıdi kompanııa ókilderi.
«QazAvtoJol» jabdyqtardy qorǵaý jáne avtomattandyrylǵan ólsheý stantsııalaryn aınalyp ótý múmkindigin boldyrmaý boıynsha qajetti sharalardy jalǵastyrady. Bul rette salmaq-gabarıttik baqylaýdy kúsheıtý júk tasymaldaýshylarǵa qarsy baǵyttalǵan shara emes.
— Júk kóligi ónerkásiptiń, qurylystyń, saýdanyń jáne tranzıttik tasymaldyń úzdiksiz jumys isteýin qamtamasyz etedi. Másele júk kóliginde emes — artyq júkte jáne barshaǵa ortaq talaptardyń saqtalýynda. Bir reıste kóbirek júk tasymaldaý jekelegen tasymaldaýshynyń shyǵynyn azaıtýy múmkin. Alaıda mundaı únemniń saldary jolda qalady: jol jamylǵysy merziminen buryn tozyp, ony qalpyna keltirýge qosymsha qarajat qajet bolady, — dep túsindirdi «QazAvtoJol».
«QazAvtoJol» UK» AQ AÓS jelisin damytýdy jáne ýákiletti memlekettik organdarmen birlesken jumysty jalǵastyryp keledi. Belgilengen salmaq normalaryn júıeli túrde buzǵany úshin jaýapkershiliktiń bultartpastyǵyn qamtamasyz etý jáne avtomattandyrylǵan baqylaýdy aınalyp ótý áreketteriniń jolyn kesý mańyzdy. Segiz aıda tirkelgen 870 myńǵa jýyq yqtımal zań buzýshylyq — nazar aýdarýdy qajet etetin eleýli kórsetkish. «QazAvtoJol» júk tasymaldaýshylardy, aýyr júk kóligi ıelerin, qurylys jáne ónerkásip kásiporyndaryn belgilengen salmaq pen ostik júkteme talaptaryn saqtaýǵa shaqyrady.
Budan buryn shamadan tys júk Taldyqorǵan – Óskemen jolyn búldirip jatqanyn jazǵanbyz.
