Qazaqstan jol ınfraqurylymyn damytýǵa shamamen 1 mlrd dollar tartady
ASTANA. KAZINFORM - Memleket basshysynyń Brıýsselge resmı sapary aıasynda «Qazaqstannyń Damý Banki» AQ sheteldik kredıtorlardan (Standard Chartered Bank, JPMorgan Chase Bank jáne Commerzbank) iri kólemdegi qaryz tartý jónindegi kredıttik kelisimge qol qoıdy.
Qaryzǵa Multilateral Investment Guarantee Agency (Kópjaqty ınvestıtsııalarǵa kepildik berý agenttigi) kepildik beredi. Sonymen qatar European Investment Bank (Eýropalyq ınvestıtsııalyq bank) pen nıet týraly hatqa qol qoıyldy, dep habarlaıdy Kazinform agenttiginiń menshikti tilshisi.
Qazaqstannyń Damý bankiniń málimetinshe, MIGA kepildigi kredıtorlardyń qorǵanysyn kúsheıtip, tartylǵan qarjynyń negizgi qaryzy men eseptelgen syıaqysynyń 95%-yna deıin jabady.
Atalǵan kredıttik kelisim aıasynda tartylatyn qarajat «QazAvtoJol» AQ júzege asyryp jatqan eki ınvestıtsııalyq jobaǵa baǵyttalady:
— respýblıkalyq mańyzy bar jalpy paıdalanymdaǵy avtomobıl joldaryn qalpyna keltirý;
— avtomattandyrylǵan ólsheý júıelerin engizý jáne jol kútimine arnalǵan arnaıy tehnıkalarmen jabdyqtaý arqyly respýblıkalyq joldardy jańǵyrtý jáne jaqsartý.
Qaryzdyń maqsatty baǵytyna sáıkes, bul qarajat atalǵan jobalar sheńberindegi ortasha jóndeý jumystaryna jumsalady.
Kazinform-ǵa bergen eksklıýzıvti suhbatynda Qazaqstannyń Damý banki basqarma tóraǵasy Marat Elıbaev sındıkattalǵan qaryz esebinen qarjylandyrylatyn jobalar eldiń 17 oblysyn qamtıtynyn aıtty. Onyń ishinde Transkaspıı halyqaralyq kólik baǵyty (Orta dáliz) men «Soltústik — Ońtústik» halyqaralyq kólik dáliziniń ýchaskeleri bar.
Óz kezeginde Eýropalyq ınvestıtsııalyq bankten tartylatyn qarajat Orta dáliz aıasyndaǵy jol ınfraqurylymy, porttar jáne logıstıka salasyndaǵy jobalardy qoldaýǵa baǵyttalady.
— Búgin Brıýsselde Qazaqstannyń Damý banki retinde eki mańyzdy kelisimge qol qoıdyq. Birinshisi — MIGA halyqaralyq agenttiginiń kepildigimen Commerzbank, JPMorgan Chase Bank jáne Standard Chartered Bank bankterimen 780 mln AQSh dollary kólemindegi kelisim. Bul qarajat Qazaqstannyń kólik-logıstıka sektoryn damytýǵa baǵyttalady. Ekinshi mańyzdy kelisim — Eýropalyq ınvestıtsııalyq bankpen 120 mln eýro kóleminde jasaldy. Bul qarjy da kólik-logıstıka salasyn damytýǵa jumsalady, — dedi Marat Elıbaev.
Jobalardy iske asyrý jol ınfraqurylymynyń sapasy men qaýipsizdigin arttyrýǵa, óńirler men halyqaralyq baǵyttardyń kólik baılanysyn jaqsartýǵa, jol júrý ýaqytyn jáne jol-kólik oqıǵalarynyń sanyn azaıtýǵa múmkindik beredi. Sondaı-aq jańa jumys oryndary ashylyp, halyq pen bıznestiń kólik ınfraqurylymyna qoljetimdiligi artady.
Jalpy, Memleket basshysynyń Brıýsselge resmı sapary qorytyndysy boıynsha 31 qujatqa qol qoıyldy. Onyń ishinde 1 úkimetaralyq kelisim jáne 30 vedomstvoaralyq ári kommertsııalyq qujat bar. Sonyń 21-i jalpy quny shamamen 12,1 mlrd AQSh dollaryn quraıtyn jobalar men bastamalardy iske asyrýdy kózdeıdi.
Eske sala keteıik, Qazaqstan men European Union Eýropalyq Odaq birlesken málimdeme qabyldady.
