Qazaqstan joǵary patogendi qus tumaýynan taza el mártebesine ıe boldy

ASTANA. KAZINFORM — Janýarlardy qorǵaýdyń dúnıejúzilik uıymy (DJDU) Qazaqstan Respýblıkasynyń joǵary patogendi qus tumaýynan ada el mártebesine ıe ekendigi jónindegi ózindik deklaratsııasyn resmı túrde maquldady. 

— Bul mańyzdy moıyndaý — Qazaqstannyń veterınarııalyq qyzmetiniń epızootııalyq qolaılylyq pen bıologııalyq qaýipsizdikti qamtamasyz etýge baǵyttalǵan júıeli jáne ǵylymı negizdelgen jumysynyń nátıjesi, — delingen Aýyl sharýashylyǵy mınıstrligi habarlamasynda.

Halyqaralyq talaptarǵa sáıkes, Aýyl sharýashylyǵy mınıstrligi epıdemıologııalyq monıtorıng, aldyn alý sharalary, qus densaýlyǵyna júrgizilgen baqylaý men Qazaqstan aýmaǵynda joǵary patogendi qus tumaýynyń oshaǵy bolmaǵany týraly málimetterdi qamtıtyn tolyq qujattamany DJDU-na joldady.

DJDU tarapynan berilgen bul moıyndaý elimizdegi veterınarııalyq baqylaýdyń joǵary deńgeıde júrgizilip otyrǵanyn rastaıdy jáne otandyq qus sharýashylyǵy ónimderiniń eksporttyq áleýetin arttyrýǵa, ásirese veterınarııalyq talaptary qatań elder naryǵyna shyǵýǵa qosymsha múmkindik beredi.

— Aýyl sharýashylyǵy mınıstrliginiń Veterınarııalyq baqylaý jáne qadaǵalaý komıteti epızootııalyq mártebelerdi saqtaý jáne keńeıtý boıynsha maqsatty jumystaryn jalǵastyryp, bıologııalyq qaýipsizdik pen veterınarııalyq qadaǵalaý salasynda joǵary standarttardy qamtamasyz ete bermek, — delingen habarlamada.

Aıta ketelik fermerler keleshekte topyraqty uqypty ustaǵany úshin ár gektarǵa 250 AQSh dollaryna deıin passıv tabys ala alatyny týraly jazǵan edik.