Qazaqstan joǵary bilim salasynda álemniń qandaı kompanııalarymen seriktes
ASTANA. KAZINFORM – Búginde elimiz Google, Huawei, NVIDIA sekildi halyqaralyq alpaýyt kompanııalarmen yntymaqtastyq ornatyp joǵary bilim salasynda birlesip jumys istep jatyr.
Bul baǵyttaǵy atqarylǵan jumys týraly tolyǵyraq Ǵylym jáne joǵary bilim mınıstrliginiń tsıfrlandyrý jáne memlekettik qyzmet kórsetý departamentiniń dırektory Nursultan Mahatov aıtyp berdi.
- Memleket basshysy Qasym-Jomart Toqaevtyń «Ádiletti Qazaqstannyń ekonomıkalyq baǵyty» atty Qazaqstan halqyna Joldaýynda jetekshi halyqaralyq kompanııalarmen yntymaqtastyq týraly tapsyrma berip, joǵary bilikti mamandardy daıarlaýǵa kóńil bóldi. Búginde mınıstrlik birqatar jetekshi halyqaralyq sonyń ishinde NVIDIA, Google, Huawei sııaqty alyp kompanııalarmen seriktestik ornatty. Atalǵan kompanııalarmen yntymaqtastyq sheńberinde qazaqstandyq ýnıversıtetter ozyq tehnologııalar men platformalarǵa qol jetkizýde, bul olarǵa zamanaýı bilim berý baǵdarlamalaryn engizýge múmkindik beredi, - dedi Nursultan Mahatov ortalyq kommýnıkatsııalar qyzmeti alańynda ótken baspasóz máslıhatynda.
Ǵylym jáne joǵary bilim mınıstrligi Google-men birlesip elimizdiń 15 joǵary oqý ornynan 5000 stýdentke arnalǵan GenAI kýrstaryn iske qosty. Kýrstar praktıkalyq bilimi bar modýlder men bloktardan, beıne sabaqtardan, sondaı-aq ár bloktyń sońynda testerden turady. Google sheshimderiniń Qazaqstannyń joǵary bilim berý júıesine sáıkestigin baǵalaý úshin Abaı atyndaǵy QazUPÝ-da Google Workspace for Education pılottyq jobasy iske qosyldy. Joba 1000 stýdent pen 100 magıstrantty qamtıdy.
NVIDIA
NVIDIA-men yntymaqtastyq aıasynda DLI Ambassador jobasyna 12 ýnıversıtetten 12 oqytýshy qatysady. Bıyl DLI sertıfıkattaryn 3 oqytýshy aldy (ál-Farabı QazUÝ, HATÝ jáne QBTÝ). Ol oqytýshylar stýdentterdi oqytyp, sertıfıkat beredi.
HUAWEI
Huawei kompanııasymen yntymaqtastyq aıasynda 43 akademııa ashyldy. Joǵary oqý oryndarynyń bazasynda 100-den astam jattyqtyrýshy daıarlandy jáne kompanııa baǵdarlamalary boıynsha 1000 stýdent sertıfıkat aldy. Korporatsııanyń jergilikti jáne halyqaralyq jarystaryna 6000-nan astam stýdent qatysty. Sondaı-aq, Huaweimen birlesip jasandy ıntellekt boıynsha 3 kýrs uıymdastyryldy, onyń ishinde akademııanyń stýdentterine arnalǵan 2 kásibı kýrs jáne barlyq tilek bildirýshilerge arnalǵan jalpy kýrs.
01 EDUSYSTEM
Byltyr jeltoqsanda Yessenov University-de 01 EduSystem negizin qalaýshy Nıkolıa Sadıraktyń qatysýymen ınnovatsııalyq baǵdarlamalaý mektebi ashyldy.
LENOVO
Byltyr jeltoqsan aıynda Satbayev University-de jobanyń alǵashqy mektebi – Lenovo College ashyldy. Bolashaqta óńirlik joǵary oqý oryndarynda da ashý josparda bar.
TECHORDA (ASTANA HUB)
Ǵylym jáne joǵary bilim mınıstrligi Astana Hub-pen birlesip Generative AI baǵyty boıynsha JOO oqytýshylaryna arnalǵan tolyqqandy kýrsty iske qosty. Ár baǵyt 6 bloktan turady. Ár bloktan keıin oqytýshylar LMS arqyly testileýden ótedi jáne progresti baqylaı alady. Atalǵan baǵdarlamaǵa 47 JOO-dan 700 oqytýshy qatysady.
Buǵan deıin habarlaǵanymyzdaı ulttyq biryńǵaı testileýde jasandy ıntellekt qoldanylady.