Qazaqstan jyl saıyn Reseıden 250 myń tonna tuqym satyp alyp otyr

ASTANA. KAZINFORM – Aýyl sharýashylyǵy mınıstrligi Kazinform saýalyna joldaǵan jaýapta Qazaqstan qaı elderden tuqym ımporttap otyrǵanyn aıtty.

Mınıstrlik málimetinde elimiz basqa elderden dándi, maıly, burshaq, jemshóp tuqymdary men kóknis tuqymyn satyp alatyny aıtylǵan.

- Qarjy mınıstrligi men Ulttyq statıstıka bıýrosynyń málimeti boıynsha, ımporttyq tuqymdardyń 250 myń tonnasy Reseıden, 2 myń tonnasy Túrkııadan, 1 myń tonnasy Germanııadan, 0,7 myń tonnasy Frantsııadan, 0,5 myń tonnasy Italııadan, 0,4 myń tonnasy Majarstannan, 0,3 myń tonnasy Nıderlandtan ákelinedi, - dep jazylǵan jaýapta.

Aıta keteıik, Qazaqstanda tuqymnyń 72% nemese 1,74 mln tonna otandyq tuqym óndirýshilerdiń esebinen qamtamasyz etilip otyr.