Qazaqstan jyl saıyn $15 mln-ǵa býyn shemirshegi ımplantyn satyp alady
ASTANA. KAZINFORM — Qazaqstan jyl saıyn keminde 11 myńnan tonnadan astam tıtan shıkizaty men quımalaryn eksporttaıdy. Soǵan qaramastan býyn shemirshekterin almastyratyn tıtan ımplanttyń árqaısysyn 1,5 myń dollarǵa syrttan alyp otyr.
Bul týraly N.J.Bátpenov atyndaǵy Ulttyq travmatologııa jáne ortopedııa ortalyǵy dırektorynyń orynbasary Arman Bátpen aıtty.
«Resmı derek boıynsha Qazaqstan byltyrǵy 11 aıda ǵana 11,9 myń tonnadan astam tıtan shıkizaty men quımalaryn eksporttaǵan. Soǵan qaramastan býyn shemirsheginiń ornyna qoldanylatyn tıtan ımplantty syrttan ımporttap otyr. Nege bulaı?» — dep surady jýrnalıst Densaýlyq saqtaý mınıstrligi uıymdastyrǵan baspasóz týry kezinde.
Travmatolog maman ondaı buıym jasaý elimizde endi ǵana qolǵa alynǵanyn aıtady.
«Iá, bizde ondaı úlken másele bar. Qazirgi tańda biz Óskemen qalasynyń D. Serikbaev atyndaǵy tehnıkalyq ýnıversıtetimen birge jumys istep jatyrmyz. Qazaqstandyq tıtan qorytpasynan medıtsınalyq quraldar jasaımyz. Onyń ishinde plastına, shtıf sııaqty shaǵyn buıymdar bolady. Al protez jasaý óte kúrdeli. Almaty qalasynda bir bıznesmen bar. Sol kisi Horvatııadan bir tehnologııa ákelip, sony ózimizge engizbekshi. Ázirge bizde tıtannan ımplant jasaıtyn tehnologııa joq», — dedi ol.
Aıta ketý kerek, 2017 jyldan beri Shyǵys Qazaqstanda óndiriletin tıtannan býyn saqınalaryna salynatyn ımplant jasaý tehnologııasy qolǵa alynǵanyn habarlaǵan edik.
Arman Bátpen ol tehnologııa qazir ǵylymı ádisteme satysynda ǵana turǵanyn aıtady. Ǵylymı jobany kommertsııalandyrý úshin qyrýar qarajat kerek.
«Atalǵan ýnıversıtettegi óndiris zerthana túrinde ǵana qurylǵan. Al zaýyt ashý úshin úlken ınvestıtsııa kerek. Jańa kórdińizder, jylyna býyn saqınalaryna 10 myń ota jasalady. Sonda jylyna 10 myń ımplant kerek degen sóz. Ondaı bir ımplanttyń quny — 1,5 myń dollar», — dedi Ulttyq travmatologııa jáne ortopedııa ortalyǵy dırektorynyń orynbasary.
lsm.kz saıtynyń málimetinshe, 2023 jyldyń qańtar-qarashasynda syrtqa eksporttalǵan 11,9 myń tonna tıtannyń quny 158,3 mln dollar bolǵan.
Sonda syrtqa shıkizat pen quıma retinde eksporttalatyn tıtannyń 100 kelisi 1330 dollardan satylyp jatyr degen sóz.
