Qazaqstan JI zańnamasyn qaıta qaraýy múmkin – Vıtse-mınıstr
ASTANA. KAZINFORM - Qazaqstan jasandy ıntellektini retteý jónindegi Big Tech kompanııalary arasynda jasalǵan kelisimdi zerdelep, qajet bolǵan jaǵdaıda ulttyq zańnamaǵa tıisti ózgerister engizýi múmkin. Bul týraly Jasandy ıntellekt jáne tsıfrlyq damý birinshi vıtse-mınıstri Rostıslav Konıashkın AI & Digital Bridge halyqaralyq forýmynda aıtty.
Sonymen qatar ol jasandy ıntellekt salasyndaǵy iri amerıkalyq kompanııalar arasynda jasalǵan kelisimge qatysty pikir bildirdi.
- Jasandy ıntellekt salasyndaǵy jetekshi amerıkalyq kompanııalar qujatqa qol qoıdy. Onda tehnologııany jaýapty paıdalaný, ony qalaı oqytýǵa bolatyny jáne qandaı tásilderge jol berilmeıtini týraly aıtylǵan. Qazaqstan – jasandy ıntellekt týraly zańdy qabyldaǵan álemdegi alǵashqy elderdiń biri. Sondyqtan qazir AQSh-tyń tájirıbesin zerdeleımiz. Qajet bolǵan jaǵdaıda zańnamamyzǵa belgili bir ózgerister engizýimiz múmkin. Alaıda normatıvtik-quqyqtyq aktiler men zańdardyń bazalyq jıyntyǵy bizde qazirdiń ózinde bar, – dedi ol.
Vıtse-mınıstr Qazaqstanda jasandy ıntellekt týraly zańmen qatar kıberqaýipsizdik salasyna qatysty zańdar jáne Tsıfrlyq kodeks qabyldanǵanyn atap ótti.
- Biz adamdardyń ómirine, bıznestiń jáne memlekettiń tsıfrlyq ortadaǵy jumysyna qatysty qajetti máselelerdiń basym bóligin rettep qoıdyq. Sýperıntellekt jónindegi kelisimdi de zerdeleımiz. Eger bul tájirıbeni Qazaqstan úshin qundy dep eseptesek, zańnamamyzǵa belgili bir túzetýler engizilýi múmkin, – dedi Rostıslav Konıashkın.
Sýperıntellekt jónindegi kelisim AQSh-tyń iri tehnologııalyq kompanııalary arasynda jasalǵan, ozyq jasandy ıntellekt júıeleriniń qaýipsizdigi men ózin-ózi retteý qaǵıdattaryna arnalǵan erikti kelisim.
Aıta keteıik, qujatqa qyrkúıek aıynda AQSh Prezıdenti Donald Tramptyń qatysýymen Google basshysy Sýndar Pıchaı, Anthropic basshysy Darıo Amodeı, Meta basshysy Mark Tsýkerberg, OpenAI prezıdenti Greg Brokman, Ilon Mask jáne NVIDIA basshysy Djensen Hýang qol qoıǵan.
Buǵan deıin Prezıdent Qasym-Jomart Toqaev AQSh prezıdenti D.Tramp bastamasymen jasalǵan sýperıntellekt týraly kelisim jahandyq deńgeıde úlgi bolýy múmkin ekenin aıtqan edi.
