Qazaqstan JI salasyn zańmen rettegen alǵashqy elderdiń biri boldy
ASTANA. KAZINFORM — Qazaqstan Jasandy ıntellekt salasyndaǵy qoǵamdyq qatynastardy retteýge zań júzinde negiz qalaǵan álemdegi alǵashqy elderdiń qataryna endi. Bul týraly QR Prezıdentiniń kómekshisi — Baspasóz hatshysy Rýslan Jeldibaı óziniń Telegram arnasynda habarlady.
Rýslan Jeldibaıdyń aıtýynsha, Prezıdent bıylǵy Joldaýynda Qazaqstandy aldaǵy úsh jyldyń ishinde tolyq tsıfrlyq memleketke aınaldyrý jóninde strategııalyq mindet qoıǵan edi.
— Elimizdiń tsıfrlyq ekojúıesin qalyptastyrý aıasynda Prezıdent tapsyrmasymen qyrýar sharýa atqaryldy. «Jasandy ıntellekt týraly» Zańnyń qabyldanýy — atalǵan saladaǵy jańalyqtyń biri. Osylaısha, Qazaqstan JI salasyndaǵy qoǵamdyq qatynastardy retteýge zań júzinde negiz qalaǵan álemdegi alǵashqy elderdiń qataryna endi. Atalǵan saladaǵy memlekettik saıasatty úılestirý maqsatynda Jasandy ıntellekt jáne tsıfrlyq damý mınıstrligi quryldy, — dep jazdy QR Prezıdentiniń kómekshisi — Baspasóz hatshysy.
Prezıdent shilde aıynda Astanada Alemcloud ulttyq sýperkompıýterin resmı túrde iske qosty. Qarasha aıyndaǵy testileý nátıjesinde atalǵan júıe sýperkompıýterlerdiń álemdik TOP-500 reıtınginde 86-orynǵa ıe boldy. «Qazaqtelekom» AQ Almatyǵa ekinshi Al‑Farabium sýperkompıýterin jetkizdi. Ol jahandyq reıtıngte 103-orynǵa taban tiredi.
— Prezıdent, eń aldymen, bilikti mamandar daıarlaýǵa basa mán berý qajet dep sanaıdy. Sondyqtan elimizde JI salasyndaǵy arnaýly zertteý ýnıversıtetin qurýdy usyndy. Astanada Alemai halyqaralyq jasandy ıntellekt ortalyǵy ashyldy. Stýdentterge arnalǵan AI-Sana baǵdarlamasy bastaldy. Sol arqyly qazirdiń ózinde 440 myńnan astam stýdent JI salasyn meńgerdi. Jasandy ıntellekt salasyndaǵy alǵashqy qazaqstandyq «syńarmúıiz» startap — Higgsfield AI paıda boldy. Bul da aıtýly ýaqıǵa, — dep atap ótti Jeldibaı.
Osydan buryn bıyl agrarlyq saladaǵy negizgi kapıtalǵa quıylǵan ınvestıtsııa 790 mlrd teńgege jetkenin jazǵan edik.
Sonymen qosa elimizde jańa baǵyttar ashylyp, halyqaralyq áýe reısteri kóbeıgeni anyqtaldy.