Qazaqstan JI meńgeretin memlekettik kadrlar sanyn jyl saıyn 30 myńǵa deıin arttyrmaq
ASTANA. KAZINFORM — Búgin Astanada halyqaralyq GovHR forýmy ótti. Іs-sharaǵa damyǵan jáne damýshy elderdiń mamandary qatysty, dep habarlaıdy Jibek Joly arnasy.
Adam jasandy ıntellektige emes, jasandy ıntellekt adamǵa beıimdelýi kerek. Elimizde memlekettik qyzmetshiler jasandy ıntellekt daǵdylaryn jetik meńgerýge tıis. Óıtkeni salada qaǵazbastylyqtan arylý protsesi qarqyndy júrip jatyr. Arnaıy baǵdarlama aıasynda jyl saıyn shamamen 30 myń memlekettik qyzmetkerdi oqytý josparlanǵan. Alaıda jasandy ıntellektige jappaı kóshý úshin normatıvtik jáne tehnıkalyq talaptardy rettep alý kerek. Ózge elderdiń tájirıbesine súıený qajet. Onyń nátıjesi týraly Qasym-Jomart Toqaev GovHR forýmyna qatysýshylarǵa joldaǵan quttyqtaý hatynda da atap ótti.
Jahandaný jáne jedel tehnologııalyq progress jaǵdaıynda halyqaralyq básekege qabiletti bolýdyń negizi — adam kapıtaly. Bul rette ásirese, daryndy jastar men kásibı mamandarǵa senim mol. Olardyń memlekettik qyzmetke kelýine, kreatıvti ıdeıalaryn júzege asyrýǵa qoldaý tanytylyp otyr. Máselen, «e-Qyzmet» júıesindegi memlekettik qyzmetke irikteýdiń jańa formaty Qazaqstan azamattaryna konkýrstarǵa onlaın túrde qatysýǵa jol ashty.
— Osy forýmnyń negizinde biz jasandy ıntellektini «e-Qyzmet-ke» engizý boıynsha ózimizde zerthana ashyldy. Sonyń ishinde sony engizý boıynsha jumystar júrgizilip jatyrmyz. Osy bizdiń ádisterimizdi, ózimizdiń oıymyzdy áriptesterimizben bólisemiz jáne olardan tyń derekterdi kútemiz. Olardy óz jumystarymyzda paıdalanamyz, — dep atap ótti QR Memlekettik qyzmet isteri agenttiginiń tóraǵasy Darhan Jazyqbaı.
Ózge elderdiń tájirıbesi artyq etpeıdi. Máselen, BAÁ-de Eńbek salasynda azamattarǵa qujattardy jasandy ıntellekt kómegimen sekýndtar ishinde óńdep beredi eken. Al kredıt nemese ıpoteka rásimdeý úshin bankter talap etetin resmı kiris jáne jalaqyny rastaıtyn qujattar tsıfrlyq formatqa kóship, qaǵaz aınalymyn tolyq qysqartqan.
— Ár qyzmetker jasandy ıntellektini erkin qoldana bilýi kerek. Óıtkeni sheshimderdi tez qabyldaý kerek. Bizde derekter osy tehnologııanyń kómegimen iske asady. Meniń oıymsha, endi 2-3 jylda barlyq salalarda jasandy ıntellekt tolyq enedi. Árıne, jumys sapary jaqsarady, biraq qyzmetkerler sany azaıady, — dedi Djasım Al Alı Mohammed Bın Rashıd mektebiniń professory.
Forýmda jańa kezeńdegi memlekettik basqarýǵa qatysty kitap tanystyryldy. Jınaqty qurastyrýǵa 19 elden 39 avtor qatysty. Al alǵysózin Qazaqstan Prezıdenti Qasym-Jomart Toqaev jazǵan.
Buǵan deıin Jasandy ıntellektini qaýipsiz qoldaný taqyrybynda tegin onlaın kýrs iske qosylatyny habarlandy.