Qazaqstan JI men adamı daǵdylardy damytý ındeksinde 55-orynǵa ıe boldy
ASTANA. KAZINFORM – Qazaqstan Coursera Global Skills Report 2026 esebi aıasynda usynylǵan AI-Human Skills Synergy Index reıtınginde 98 eldiń arasynda 55-orynǵa ıe boldy, dep habarlaıdy Ǵylym jáne joǵary bilim mınıstrligi.
Jańa ındeks bilim alýshylardyń jasandy ıntellekt salasyndaǵy daǵdylardy synı oılaý, kóshbasshylyq, kommýnıkatsııa jáne kúrdeli mindetterdi sheshý sekildi adamı quzyrettermen qatar qanshalyqty belsendi damytyp jatqanyn baǵalaıdy.
Indeksti esepteý kezinde onlaın oqytý paıdalanýshylarynyń daǵdylardy meńgerý deńgeıi, zerdeleıtin quzyretteriniń aýqymy, JI men adamı daǵdylardy qatar damytý kórsetkishteri eskeriledi.
Sondaı-aq baǵalaý barysynda Oxford Insights Government AI Readiness Index derekteri paıdalanylady. Bul ındeks elderdiń jasandy ıntellekt múmkindikterin paıdalanýǵa qanshalyqty daıyn ekenin memlekettik saıasat, ınfraqurylym, adamı kapıtal jáne JI sektorynyń damý deńgeıi boıynsha baǵalaıdy.
– Qazaqstan AI-Sana ulttyq baǵdarlamasyn iske qosqanda tsıfrlyq kýrstarǵa qoljetimdilikti qamtamasyz etý jetkiliksiz ekenin túsindik. Júıeli ózgeristerge qol jetkizý úshin alynǵan bilimdi bilim berý protsesine engizip, ony is júzinde qoldanýǵa múmkindik beretin jaǵdaı jasaý mańyzdy boldy. Búginde baǵdarlamaǵa 100 joǵary oqý orny qatysyp, kýrstardy bilim berý protsesine engizý, nátıjelerdi baqylaý jáne jasandy ıntellekt tehnologııalarynyń qarqyndy damýyna sáıkes oqý mazmunyn turaqty túrde jańartý baǵytynda jumys júrgizip keledi. Qazirdiń ózinde 1 200-den astam pedagog zamanaýı onlaın oqytý ádisterin meńgerip, sapaly 35 avtorlyq kýrs ázirleýge qatysty, – dedi Ǵylym jáne joǵary bilim mınıstri Saıasat Nurbek.
Mınıstrlik málimetinshe, Qazaqstannyń nátıjesi tsıfrlyq oqytýdy belsendi paıdalanýshylar arasynda jasandy ıntellekt salasyndaǵy tehnıkalyq quzyrettermen qatar olardy is júzinde qoldanýǵa qajetti adamı daǵdylarǵa da qyzyǵýshylyq bar ekenin kórsetedi.
Degenmen reıtıng nátıjesin baǵalaǵanda onyń ádistemelik ereksheligin eskerý qajet. Coursera derekteri negizinen osy platformany paıdalanýshylardyń oqý belsendiligine súıenedi. Sondyqtan 55-oryn jalpy Qazaqstan halqynyń JI salasyndaǵy daǵdy deńgeıin tikeleı kórsetpeıdi.
Aıta keteıik, buǵan deıin Kazinform Qazaqstannyń Coursera platformasyn joǵary bilim berý júıesine ıntegratsııalaýdy keńeıtip jatqanyn jazǵan edi.
