Qazaqstan JI-hakatonǵa qatysýshylar sanymen Gınnes rekordyn jańartty
ASTANA. KAZINFORM — Qazaqstan jasandy ıntellekt boıynsha hakatonǵa qatysýshylar sany jóninen GUINNESS WORLD RECORDS álemdik rekordyn ornatty. Rekord 23 qyrkúıekte Astanada ótken halyqaralyq HackAlem AI saıysynda tirkeldi.
AI & Digital Bridge forýmy aıasynda Guinness World Records resmı tóreshisi Glenn Pollard hakatonǵa barlyq talapty oryndaǵan 2415 adam qatysqanyn málimdedi.
Osylaısha, Qazaqstan 2025 jylǵy jeltoqsanda Úndistanda ornatylǵan aldyńǵy rekordtan asyp tústi. Úndistanda osyndaı JI-hakatonǵa 2089 adam qatysqan edi.
Sertıfıkatty tabystaý kezinde Glenn Pollard is-sharanyń aýqymy men uıymdastyrylý deńgeıine joǵary baǵa berdi.
— Men tóreshi retinde 14 jylda úlkendi-kishili kóptegen rekordty kórdim. Bul hakatondy ótkizýge qanshalyqty kóp jumys júrgizilgenin óz kózimmen kórdim jáne sizderdiń qandaı qıyndyqtarǵa tap bolǵandaryńyzdy bilemin, — dedi ol.
Onyń aıtýynsha, hakatonda aýqymdy tehnıkalyq ınfraqurylym jasaqtalǵan. Іs-shara ótetin alańda 75 shaqyrymnan astam derek taratý kabeli tartylyp, hakaton kezinde 4,5 TB derek óńdelgen.
— Hakatonǵa JI salasynyń mamandary men áýesqoılary — jastar da, eresekter de qatysty. Olardyń arasynda 120-dan astam ýnıversıtet pen 21 eldiń ókilderi bar. Josparlaý, daıyndyq jáne uıymdastyrý jumystarynyń joǵary deńgeıi meni erekshe tańǵaldyrdy, — dep atap ótti Guinness World Records ókili.
Glenn Pollard jahandyq tehnologııalyq kompanııalardyń, sonyń ishinde OpenAI, NVIDIA jáne Palo Alto Networks kompanııalarynyń qatysýyna da toqtaldy.
— Bul rekordty ornatý arqyly sizder Guinness World Records ataǵyna ıe bolǵan tańdaýly toptyń qataryna qosyldyńyzdar. Budan bólek, endi osy hakaton sanaty boıynsha álemdegi úzdik kórsetkishtiń ıesi retinde resmı tanyldyńyzdar, — dedi ol.
Tóreshi Qazaqstanda JI boıynsha bilim berý, ınnovatsııa jáne tehnologııalardyń damyp kele jatqanyna da nazar aýdardy.
— Bul ataq Qazaqstannyń jasandy ıntellektini oqytý, damytý jáne ınnovatsııalar salasyndaǵy jetistikterimen qatar alǵanda, sizderdiń JI ındýstrııasynda iz qaldyrǵandaryńyzdy kórsetedi. Endi buǵan álem nazar aýdarýy kerek, — dedi Glenn Pollard.
Sertıfıkatty Qazaqstan Úkimetiniń atynan qabyldaǵan Premer-mınıstrdiń orynbasary — jasandy ıntellekt jáne tsıfrlyq damý mınıstri Jaslan Mádıev hakatonǵa qatysýshylar men seriktesterge alǵys aıtty.
— Bul óte kúrdeli jumys boldy. Muny seriktesterdiń jáne osy hakatonǵa qatysqan barsha adamnyń qoldaýynsyz júzege asyrý múmkin emes edi, — dedi Jaslan Mádıev.
HackAlem AI «Jasandy ıntellekt aılyǵy» aıasynda ótip, túrli elderden kelgen ázirleýshilerdi, stýdentter men jas mamandardy biriktirdi. Qatysýshylar energetıka, qarjy, memlekettik basqarý, telekommýnıkatsııa, logıstıka, kreatıvti ındýstrııalar, bilim berý, ınnovatsııalar, kommýnıkatsııalar jáne saýda sııaqty 10 baǵyt boıynsha JI-sheshimder ázirledi.
Hakaton qatysýshylary OpenAI, NVIDIA jáne Arizona State University usynǵan jalpy quny 1,5 mln dollarǵa deıingi tehnologııalyq jáne bilim berý resýrstaryna qol jetkizdi.
Buǵan deıin halyqaralyq JI sarapshysy, Sinovation Ventures jáne 01.AI kompanııalarynyń bas dırektory Lı Kaı Fý Qazaqstannyń tolyqqandy jasandy ıntellekt ortalyǵyna aınalýy úshin ne qajet ekenin aıtqan edi.
