Qazaqstan JI daǵdylaryn Coursera arqyly kúsheıtip jatyr
ASTANA. KAZINFORM — Qazaqstan Coursera platformasyn joǵary bilim berý júıesine ıntegratsııalaýdy keńeıtip jatyr.
FWD Virtual 2026 halyqaralyq is-sharasy aıasynda «Jasandy ıntellekt dáýirinde kadrlardy eńbek naryǵyna daıyndaý» taqyrybynda paneldik sessııa ótti. Talqylaýǵa QR Ǵylym jáne joǵary bilim mınıstri Saıasat Nurbek, Texas A& M ýnıversıtetter júıesiniń oqytýdaǵy ınnovatsııalar jónindegi vıtse-kantsler orynbasary Kım Rınırson jáne Randstad kompanııasynyń daǵdylar men kadrlardy damytý jónindegi jahandyq baǵytynyń jetekshisi Renate Deken qatysty. Pikirtalasty Coursera jáne Udemy kompanııalarynyń klıenttermen jumys jónindegi dırektory Nıracha Taıchahýnavýd júrgizdi.
Qatysýshylar jasandy ıntellekt dáýiriniń talaptaryna saı kadr daıarlaý, tsıfrlyq jáne adamı daǵdylardy damytý, bilim berý baǵdarlamalaryn transformatsııalaý jáne túlekterdiń mansapqa daıyndyǵyn arttyrý máselelerin talqylady. Sondaı-aq quzyretterdi damytýdyń praktıkalyq tásilderi men jasandy ıntellektini bilim berý úderisine engizýge erekshe nazar aýdaryldy.
Paneldik sessııa barysynda Saıasat Nurbek Qazaqstannyń Coursera platformasymen yntymaqtastyǵynyń nátıjelerine toqtalyp, halyqaralyq onlaın-kýrstarǵa qoljetimdilikti qamtamasyz etýden bastap, olardy bilim berý baǵdarlamalaryna tolyq engizýge deıingi jumystyń negizgi kezeńderin atap ótti.
— Úsh jyl ishinde halyqaralyq onlaın-kýrstardy stýdentterge qoljetimdi etýden olardy bilim berý baǵdarlamalarynyń mazmunyna tolyq engizýge deıingi mańyzdy kezeńderden óttik. Bul tehnologııalar qarqyndy damyp, jasandy ıntellekt, derekterdi taldaý jáne kıberqaýipsizdik sııaqty salalarda jańa quzyretter qalyptasyp jatqan kezeńde asa mańyzdy. Coursera platformasymen yntymaqtastyqty 2023 jyly 25 óńirlik ýnıversıtetten bastadyq. Búginde platforma Qazaqstannyń 100 joǵary oqý ornynda qoldanylady. Sonymen qatar onlaın-kýrstar bilim berý baǵdarlamalarynyń mazmunyna engizilip, olardy oqý nátıjeleri retinde tanýǵa jáne akademııalyq kredıtterge qaıta esepteýge múmkindik berildi. Osylaısha, stýdentterge eńbek naryǵynda suranysqa ıe ózekti bilim men quzyretterdi meńgerýge múmkindik beretin ıkemdi bilim berý modelin qalyptastyryp kelemiz, — dedi mınıstr.
2023-2025 jyldary bilim berý baǵdarlamalaryna 11 984 onlaın-kýrs engizilip, stýdentterge 211 726 akademııalyq kredıt qaıta esepteldi. Platformada alynǵan bilim nátıjeleri 190 630 stýdent úshin resmı tanyldy.
Yntymaqtastyqtyń mańyzdy baǵyttarynyń biri — jasandy ıntellekt salasyndaǵy quzyretterdi damytý. 2025 jyly 98 044 bilim alýshy JI baǵyttary boıynsha 109 987 sertıfıkat aldy. AI-Sana baǵdarlamasy aıasynda Coursera osy baǵyttaǵy daǵdylardy meńgerýge múmkindik beretin negizgi platformalardyń birine aınaldy.
Mınıstr óz sózinde baǵdarlamanyń nátıjeleri stýdentterdiń praktıkalyq jobalarynan da kórinetinin atap ótti. Qazaqstandyq joǵary oqý oryndarynyń bilim alýshylary JI tehnologııalaryn paıdalana otyryp, 100-den astam startap pen qoldanbaly sheshim ázirledi. Olardyń qatarynda ym tilin aýdarýǵa arnalǵan SignBridge, memlekettik satyp alýlarǵa post-aýdıt júrgizýge arnalǵan Baqylay.kz jáne tserebraldy sal aýrýy bar balalarǵa arnalǵan AI-modýli bar SmartWalk quraly bar.
Yntymaqtastyq aıasynda bilim berý kontentin qazaq jáne orys tilderine beıimdeýge de kóńil bólinedi. Búginde 171 kýrs lokalızatsııalandy, 16 qazaqstandyq joǵary oqý orny Coursera platformasynda ózderiniń jappaı ashyq onlaın-kýrstaryn ornalastyrdy. Sonymen qatar 2 myńnan astam oqytýshy Course Builder baǵdarlamasy boıynsha oqýǵa múmkindik aldy.
Jobanyń negizgi seriktesteri qatarynda «Qazaqstan halqyna» qoǵamdyq qory men Bilim Upskill bar. Qordyń qoldaýymen 2023 jyly joba óńirlerde iske qosylyp, 25 joǵary oqý orny men 23 myń stýdent qamtyldy. Bilim Upskill kýrstardy aýdarý jáne beıimdeý, oqytýshylardy oqytý, sondaı-aq onlaın-oqytýdy oqý úderisine engizý boıynsha joǵary oqý oryndaryna qoldaý kórsetedi.
Búginde Coursera Qazaqstannyń bilim berý ekojúıesiniń bir bóligine aınaldy. Onlaın-oqytý stýdentterdiń qosymsha bilim alýymen qatar bilim berý baǵdarlamalaryn jańartýǵa jáne suranysqa ıe quzyretterdi qalyptastyrýǵa múmkindik beredi. Jalpy 255 myńnan astam bilim alýshy platforma sertıfıkattaryn aldy, al berilgen sertıfıkattardyń jalpy sany 554 784-ke jetti.
2028 jylǵa deıingi yntymaqtastyqtyń kelesi kezeńinde Qazaqstannyń joǵary oqý oryndaryna jyl saıyn keminde 30 myń lıtsenzııa qoljetimdi bolady. Negizgi basymdyq JI kýrstary men mıkrobiliktilikterdi bilim berý baǵdarlamalaryna engizýge jáne eńbek naryǵynda suranysqa ıe daǵdylar týraly derekterdi paıdalana otyryp, kadr daıarlaý mazmunyn jedel jańartýǵa beriledi.
Bul tásil halyqaralyq bilim berý platformalarynyń múmkindikterin stýdentterdiń, joǵary oqý oryndary men eńbek naryǵynyń qajettilikterimen tyǵyz baılanystyrýǵa múmkindik beredi.
