Qazaqstan JI baǵytynda mańyzdy taqyryptarǵa bastamashy boldy - Armenııa vıtse-premeri
ASTANA. KAZINFORM – Jasandy ıntellekt salasyndaǵy jahandyq báseke memleketterdiń ekonomıkalyq jáne tehnologııalyq derbestiginiń sheshýshi faktoryna aınalyp jatyr. Bul týraly elordada V Eýrazııalyq ekonomıkalyq forýmnyń plenarlyq otyrysynda Armenııa vıtse-premeri Mger Grıgorıan málim etti.
- Qazaqstannyń EAEO-ǵa tóraǵalyǵy aıasynda mazmundy taqyryptar qamtylǵan, ıaǵnı tsıfrlyq transformatsııanyń praktıkalyq máselelerine baǵyttalǵan. Sondyqtan búgingi kún tártibindegi ózekti taqyryptardyń biri retinde jasandy ıntellekti tańdalǵany ábden oryndy, - dedi Mger Grıgorıan.
Osy oraıda ol álem elderi tereń tehnologııalyq transformatsııa kezeńine aıaq basqanyn atap ótti. Bul rette jasandy ıntellekt salasyndaǵy jahandyq báseke tıimdilik pen ónimdilikti arttyrý máselesi ǵana emes, sonymen qatar memleketterdiń ekonomıkalyq jáne tehnologııalyq derbestiginiń sheshýshi faktoryna aınalyp jatyr.
- Jahandyq ekonomıkalyq kún tártibi qazirdiń ózinde jasandy ıntellektiniń qarqyndy damýy yqpalymen qalyptasyp keledi. Elderdiń básekelestik artyqshylyqtary olardyń resýrstyq áleýetimen ǵana emes, eń aldymen, ozyq tehnologııalardy ekonomıkalary men memlekettik basqarý júıelerine tıimdi ıntegratsııalaý qabiletimen aıqyndalady. Atap aıtqanda, jasandy ıntellekt dáýiriniń basty resýrsy - adam, ıaǵnı aýqymdy derektermen, algorıtmdermen jáne tsıfrlyq platformalarmen jumys isteýge qabiletti mamandar joǵary baǵalanady. Demek, memleketter tek tehnologııa boıynsha ǵana emes, bilim sapasy men ǵylymı ortanyń damý deńgeıi boıynsha da básekege túsedi, - dedi Armenııa vıtse-premeri.
Budan buryn habarlanǵandaı, Qazaqstan Prezıdenti EAEO-nyń áleýetin nyǵaıtýdyń strategııalyq mańyzdy mindetine qatysty pikir aıtty.
